لاہور ہائیکورٹ،پنجاب کے نئے ڈویژن، اضلاع ختم کرنے کا نوٹیفکیشن کالعدم قرار دینے کا تحریری فیصلہ جاری نگران حکومت صرف روز مرہ کے معاملات چلا سکتی ہے، آئین اور قانون اسے منتخب حکومت کے طور پر معاملات چلانے کی اجازت نہیں دیتا

• عدالت میں بڑی تعداد میں کیسز کا آنا نگران حکومت کے اختیارات کے غلط استعمال کو ظاہر کرتا ہے
• الیکشن کمیشن آگے بڑھے اور اختیار سے تجاوز پر نگران کابینہ کو لگام ڈالے،تحریری فیصلہ

لاہور (ویب نیوز)

لاہور ہائیکورٹ نے پنجاب کے نئے ڈویژن، اضلاع اور سات تحصیلوں کو ختم کرنے کے نگرا ن حکومت کا نوٹیفکیشن کالعدم قرار دینے کا تحریری فیصلہ جاری کر دیا۔ جسٹس شاہد کریم نے سات صفحات پر مشتمل تحریری فیصلہ جاری کیا۔ اخلاق حیدر چٹھہ سمیت دیگر کی درخواستوں پر جاری تحریری فیصلے میں کہا گیا کہ نگران حکومت صرف روز مرہ کے معاملات چلا سکتی ہے، آئین اور قانون نگران حکومت کو منتخب حکومت کے طور پر معاملات چلانے کی اجازت نہیں دیتا۔فیصلے کے مطابق نگراں حکومت صاف شفاف انتخابات کیلئے الیکشن کمیشن کی معاونت اور مدد کرتی ہے، نگراں حکومت کے اقدامات سے کسی فرد یا سیاسی جماعت سے تعصب ظاہر نہ ہو، نگراں حکومت مختصر مدت کیلئے انتخابات کرانے کیلئے بنائی جاتی ہے۔تحریری فیصلے میں لکھا گیا کہ عدالت میں بڑی تعداد میں کیسز کا آنا نگرا ن حکومت کے اختیارات کے غلط استعمال کو ظاہر کرتا ہے، الیکشن کمیشن آگے بڑھے اور اختیار سے تجاوز پر نگران کابینہ کو لگام ڈالے، الیکشن کمیشن نگران حکومت کی کارکردگی اور اقدامات پر نظر رکھتا ہے، شفاف انتخابات کیلئے تمام ریاستی ادارے اور نگراں حکومت الیکشن کمیشن کی معاونت کے پابند ہیں۔