ملک بھر میں غیرقانونی تارکین وطن کیخلاف آپریشن، متعدد افراد زیر حراست
کراچی میں گھر گھر تلاشی کے دوران 50 سے زائد افراد کو حراست میں لے لیا گیا
بغیر دستاویز مزید 19 افراد ڈیپورٹ کر دیئے، اسلام آباد سے ڈیپورٹ ہونے والوں کی تعداد 83 ہوگئی،ڈی سی
جہلم میں پولیس نے غیر قانونی مقیم افراد کیخلاف آپریشن کرتے ہوئے ضلع بھر سے 98 افراد کو پکڑ کر انخلا کیمپ منتقل کر دیا
قصور اور پتوکی میں بھی پولیس نے مختلف علاقوں میں آپریشن کر کے 100 سے زائد غیرقانونی تارکین وطن کو حراست میں لیا
اسلام آباد ،کراچی (ویب نیوز)
حکومتی ڈیڈلائن ختم ہونے کے بعد غیرقانونی تارکین وطن کے خلاف کارروائیوں کا سلسلہ جاری ہے، مختلف شہروں سے متعدد افراد کو زیر حراست لیا گیا ۔کراچی میں پولیس نے غیر قانونی مقیم افراد کیخلاف سائٹ سپر ہائی وے احسن آباد یثرب گوٹھ میں آپریشن کیا اور گھر گھر تلاشی کے دوران 50 سے زائد افراد کو حراست میں لے لیا گیا۔ گزشتہ روز بھی کراچی میں غیرقانونی مقیم غیرملکیوں کے خلاف کارروائیوں میں تین سو سے زائد افراد کو گرفتار کیا گیا تھا۔ وفاقی دارالحکومت اسلام آباد میں غیر قانونی طور پر قیام پذیر تارکین وطن کیخلاف ضلعی انتظامیہ اور پولیس کا آپریشن جاری ہے۔ڈی سی اسلام آباد عرفان نواز میمن نے کہا کہ بغیر دستاویز مزید 19 افراد ڈیپورٹ کر دیئے، اسلام آباد سے ڈیپورٹ ہونے والوں کی تعداد 83 ہوگئی، ملک بھر سے رضا کارانہ طور پر 1 لاکھ 40 ہزار 322 غیر ملکی واپس جا چکے ہیں۔دوسری جانب جہلم میں بھی پولیس نے غیر قانونی مقیم افراد کیخلاف آپریشن کرتے ہوئے ضلع بھر سے 98 افراد کو پکڑ کر انخلا کیمپ منتقل کر دیا ہے، پکڑے گئے افراد میں خواتین، بچے اور مرد شامل ہیں۔کارروائیاں دینہ، سوہاوہ، جلال پور شریف اور جہلم شہر کے علاقوں میں کی گئی ہیں، ضروری کارروائی کے بعد تارکین وطن کو افغانستان کے لئے پشاور بھیجا جائے گا۔علاوہ ازیں کوئٹہ میں پاک افغان سرحد سے غیرقانونی تارکین وطن کی واپسی جاری ہے، دس ہزار سے زائد افراد رضاکارانہ طور پر سرحد پار کر گئے، کوئٹہ سے گرفتار کئے جانے والے 500 سے زائد افراد کو چمن پہنچا دیا گیا۔کوئٹہ شہر کے مختلف علاقوں میں پولیس غیر قانونی طور مقیم افراد کی گرفتاری کے لئے کارروائی کر رہی ہے، گرفتار کئے جانے والوں کو ہولڈنگ سینٹر منتقل کیا جا رہا ہے۔ادھر قصور اور پتوکی میں بھی پولیس نے مختلف علاقوں میں آپریشن کر کے 100 سے زائد غیرقانونی تارکین وطن کو حراست میں لیا ہے، حراست میں لیے گئے تمام افراد کی بائیو میٹرک ویریفیکیشن کی جا رہی ہے، رجسٹرڈ نہ ہونے کی صورت میں غیر ملکیوں کے خلاف کارروائی عمل میں لائی جائے گی۔
