ذوالفقار علی بھٹو قتل کیس پر صدارتی ریفرنس سماعت کے لیے مقرر
چیف جسٹس قاضی فائز عیسی کی سربراہی میں نو رکنی لارجر بینچ بارہ دسمبر کو صدارتی ریفرنس کی سماعت کرے گا
اسلام آباد( ویب نیوز)
سپریم کورٹ میں سابق وزیراعظم ذوالفقار علی بھٹو کو عدالت سے پھانسی کے معاملے پر صدارتی ریفرنس سماعت کیلیے مقرر، نو رکنی لارجر بینچ سماعت کرے گا۔ سپریم کورٹ نے سابق وزیراعظم ذوالفقار علی بھٹو کو پھانسی کے کیس میں صدراتی ریفرنس آئندہ ہفتے 12 دسمبر بروز منگل سماعت کے لیے مقرر کردیا ہے۔چیف جسٹس قاضی فائز عیسی کی سربراہی میں نو رکنی لارجر بینچ صدارتی ریفرنس کی سماعت کرے گا۔جسٹس سردار طارق مسعود، جسٹس منصور علی شاہ، جسٹس یحیی آفریدی، جسٹس حسن اظہر رضوی اور جسٹس مسرت ہلالی نو رکنی لارجر بینچ کا حصہ ہیں۔جسٹس امین الدین، جسٹس جمال مندوخیل، جسٹس محمد علی مظہر بھی بینچ میں شامل ہیں۔سابق صدر آصف علی زرداری نے اپریل 2011 میں صدارتی ریفرنس سپریم کورٹ میں دائر کیا تھا۔ذوالفقار بھٹو سے متعلق صدارتی ریفرنس پر اب تک سپریم کورٹ میں 6 سماعتیں ہو چکی ہیں۔صدارتی ریفرنس پر پہلی سماعت 2 جنوری 2012 کو جبکہ آخری سماعت 12 نومبر 2012 کو ہوئی تھی۔صدارتی ریفرنس پر پہلی 5 سماعتیں سابق چیف جسٹس افتخار چوہدری کی سربراہی میں سپریم کورٹ کے 11 رکنی لارجر بینچ نے کیں۔صدارتی ریفرنس پر آخری سماعت 9 رکنی لارجر بینچ نے کی تھی۔سابق وزیر اعظم ذوالفقار بھٹو سے متعلق صدارتی ریفرنس پانچ سوالات پر مبنی ہے۔ صدارتی ریفرنس کا پہلا سوال یہ ہے کہ ذوالفقار بھٹو کے قتل کا ٹرائل آئین میں درج بنیادی انسانی حقوق مطابق تھا؟دوسرا سوال یہ ہے کہ کیا ذوالفقار بھٹو کو پھانسی کی سزا دینے کا سپریم کورٹ کا فیصلہ عدالتی نظیر کے طور پر سپریم کورٹ اور تمام ہائی کورٹس پر آرٹیکل 189 کے تحت لاگو ہوگا؟ اگر نہیں تو اس فیصلے کے نتائج کیا ہوں گے؟ تیسرا سوال یہ ہے کہ کیا ذوالفقار علی بھٹو کو سزائے موت سنانا منصفانہ فیصلہ تھا؟ کیا ذوالفقار علی بھٹو کو سزائے موت سنانے کا فیصلہ جانبدار نہیں تھا؟چوتھے سوال میں پوچھا گیا ہے کہ کیا ذوالفقار علی بھٹو کو سنائی جانے والی سزائے موت قرآنی احکامات کی روشنی میں درست ہے؟ جبکہ پانچواں سوال یہ ہے کہ کیا ذوالفقار علی بھٹو کے خلاف دیے گئے ثبوت اور گواہان کے بیانات ان کو سزا سنانے کے لیے کافی تھے۔۔
