اسلام آباد ہائیکورٹ کا ایف آئی اے کو بشری بی بی اور لطیف کھوسہ کی آڈیو کی فارنزک کا حکم
عدالت کا درخواست کی کاپی ڈی جی آئی ایس آئی کو بھجوانے کا حکم ،ڈی جی آئی ایس آئی بھی رپورٹ دیں کہ آڈیو کس نے ریلیز کی ،جسٹس بابرستار
تحقیقات کی جائیں بشری بی بی کی آڈیو سب سے پہلے کہاں سے جاری ہوئی، پیمرا بتائے لوگوں کی نجی گفتگو کیسے ٹی وی چینلز پر نشر ہو رہی ہے؟، عدالت
عدالت نے ایف آئی اے، پیمرا اور پی ٹی اے کو نوٹس جاری کر کے جواب طلب کر لیا ،کیس کی مزید سماعت 11 دسمبر تک ملتوی
اسلام آباد( ویب نیوز)
اسلام آباد ہائیکورٹ نے ایف آئی اے کو سینئر وکیل لطیف کھوسہ اور سابق چیئرمین پی ٹی آئی کی اہلیہ بشری بی بی کی لیک ہونے والی آڈیو کی فارنزک کا حکم دے دیااور کہا کہ تحقیقات کی جائیں بشری بی بی کی آڈیو سب سے پہلے کہاں سے جاری ہوئی، عدالت نے درخواست کی کاپی ڈی جی آئی ایس آئی کو بھجوانے کا حکم دیتے ہوئے کہا کہ ڈی جی آئی ایس آئی بھی رپورٹ دیں کہ آڈیو کس نے ریلیز کی ،عدالت نے ایف آئی اے، پیمرا اور پی ٹی اے کو نوٹس جاری کرتے ہوئے جواب طلب کر لیا،جسٹس بابر ستار نے کہا پیمرا بتائے لوگوں کی نجی گفتگو کیسے ٹی وی چینلز پر نشر ہو رہی ہے؟۔ اسلام آباد ہائی کورٹ میں سابق چیئرمین پی ٹی آئی کی اہلیہ بشری بی بی کی آڈیو لیک کے خلاف درخواست پر سماعت ہوئی۔جسٹس بابرستار نے درخواست پر عائد اعتراضات ختم کرتے ہوئے استفسار کیا درخواست پر رجسٹرار آفس کا کیا اعتراض ہے؟لطیف کھوسہ نے بتایا اعتراض ہے کہ الگ درخواست دائر کریں، متفرق درخواست کیسیکر سکتے ہیں؟ آڈیو لیکس کیس میں متفرق درخواست دائر ہو سکتی ہے، وکیل اور موکل کے درمیان گفتگو پر استحقاق ہوتا ہے۔جسٹس بابر ستار نے ریمارکس دئیے بگ باس سب سن رہا ہوتا ہے آپ کو تو پتہ ہونا چاہیے، جسٹس بابر ستار کی بات پر عدالت میں قہقہے لگ گئے۔جسٹس بابرستار نے پوچھا آڈیو کون ریکارڈ کر رہا ہے؟ جس پر لطیف کھوسہ نے کہا سب کو پتہ ہے کون ریکارڈ کرتا ہے، جسٹس بابر ستار نے کہا مفروضے پر تو نہیں چل سکتے۔لطیف کھوسہ نے کہا یہ میرا نہیں پورے ملک کے وکلا کا مسئلہ ہے، وکیل موکل سے آزادی سے بات نہ کر سکے تو نظام انصاف کیسے چلے گا؟اسلام آباد ہائیکورٹ کے جسٹس بابر ستار نے استفسار کیا کہا آڈیو سوشل میڈیا پر آئی ہے؟ جس پر لطیف کھوسہ نے کہا آڈیو تمام ٹی وی چینلز نے بھی نشر کی، جسٹس بابر ستار کا کہنا تھا سب سے پہلے ٹوئٹر (ایکس)پر آئی یا کہیں اور؟ یہ معلوم ہو جائے ریلیز کہاں ہوئی ہے تو پتہ چل سکتا ہے ریکارڈ کس نے کی؟لطیف کھوسہ نے کہا پیمرا ویسے تو کسی کا نام لینے پر بھی اسکرین بند کر دیتا ہے، مجھ سے کوئی بات نہیں کرتا کہ آپ کا فون ہی محفوظ نہیں۔ جسٹس بابر ستار نے درخواست کی کاپی ڈی جی آئی ایس آئی کو بھجوانے کا حکم دیتے ہوئے کہا کہ ڈی جی آئی ایس آئی بھی رپورٹ دیں کہ آڈیو کس نے ریلیز کی۔ عدالت نے بشری بی بی اور لطیف کھوسہ کی آڈیو لیک کے معاملے پر ایف آئی اے، پیمرا اور پی ٹی اے کو نوٹس جاری کرتے ہوئے جواب طلب کر لیا اور کیس کی مزید سماعت 11 دسمبر تک ملتوی کر دی۔
