سابق چیئرمین پی ٹی آئی ،بشریٰ بی بی کیخلاف غیر شرعی نکاح کیس کے جیل ٹرائل کا حکم
غیر شرعی نکاح کیس کی اگلی سماعت اڈیالہ جیل میں ہوگی اور جیل میں کیس کا اوپن ٹرائل ہوگا
خاندان کے ا فراد اور شہری شرکت کرنا چاہیں جاسکتے ہیں، کیس کی مزید سماعت 22 دسمبر تک ملتوی
میڈیا نمائندے اور شہری سماعت کیلئے جیل رولزکے تحت سپرنٹنڈنٹ سے رابطہ کریں گے
اسلام آباد ( ویب نیوز)
اسلام آباد کی ڈسٹرکٹ اینڈ سیشن عدالت نے سابق چیئرمین پی ٹی آئی اور ان کی اہلیہ بشریٰ بی بی کے مبینہ غیر شرعی نکاح کیس کے جیل ٹرائل کا حکم دے دیا۔اسلام آباد کی ڈسٹرکٹ اینڈ سیشن کورٹس میں سول جج قدرت اللہ نے بانی پی ٹی آئی عمران خان اور بشریٰ بی بی کے خلاف مبینہ غیر شرعی نکاح کیس کی سماعت کی جس سلسلے میں بشریٰ بی بی کے وکیل عثمان گل عدالت میں پیش ہوئے۔عثمان گل نے عدالت کو بتایا کہ بشریٰ بی بی لاہور میں ہیں اور وہ عدالت پیش نہیں ہوسکتیں، اس پر عدالت نے کہا کہ سابق چیئرمین پی ٹی آئی جیل میں ہیں، بشریٰ بی بی تو جیل میں نہیں ہیں۔بشریٰ بی بی کے وکیل عثمان گل نے کہا کہ اگلی سماعت پر بشریٰ بی بی پیش ہو جائیں گی، ضمانتی مچلکے تیار ہیں مگر دستخط نہیں ہوسکے، 2 سے 3 بجے کا وقت رکھ لیں کوشش کرلیتے ہیں بشریٰ بی بی پیش ہوجائیں۔ عدالت نے کہا کہ بشریٰ بی بی واقعی میں بیمار ہیں تو درخواست کے ساتھ میڈیکل لگادیں، جیل سے سابق چیئرمین پی ٹی آئی سے متعلق رپورٹ آجائے تو دیکھ لیتے ہیں۔اس پر عثمان گل نے کہا کہ رپورٹ جو آنی ہے وہ آپ کو بھی پتا ہمیں بھی پتا، اس پر جج نے عثمان گل سے مکالمہ کیا کہ مجھے نہیں پتا آپ بتا دیں کیا رپورٹ آنی ہے،کوشش کریں صرف اسی کیس سے متعلق بات کریں عدالت میں۔وکیل عثمان گل نے عدالت سے استدعا کی کہ لاہور سے آنا ہوتا ہے تاریخ لمبی دے دیا کریں یا چھٹیوں کے بعد سماعت رکھ لیں، اس پر عدالت نے کہا کہ کچھ عرصے تک اسلام آباد میں کرائے پر گھر لے لیں، چھٹیوں سے پہلے ایک سماعت رکھیں گے۔ بعد ازاں جیل حکام نے سابق چیئرمین پی ٹی آئی کو عدالت میں پیش کرنے سے معذرت کرلی اور اپنا جواب عدالت میں جمع کرایا۔جیل سپرنٹنڈنٹ نے اپنے جواب میں کہا کہ سکیورٹی تھریٹ پر سابق چیئرمین پی ٹی آئی کو عدالت میں پیش نہیں کرسکتے۔سپرنٹنڈنٹ جیل کی جانب سے سابق چیئرمین پی ٹی آئی کی پیشی کے لئے پولیس حکام کوبھی خط لکھاگیا۔عدالت نے سابق چیئرمین پی ٹی آئی اور ان کی اہلیہ بشریٰ بی بی کے خلاف غیر شرعی نکاح کیس میں جیل ٹرائل کا حکم دے دیا۔عدالت کی جانب سے جاری حکم نامے میں کہا گیا کہ سابق چیئرمین پی ٹی آئی کی عدالت میں پیشی سے متعلق سپرنٹنڈنٹ اڈیالہ جیل کے جواب کے بعدفیصلہ کیاگیا، غیر شرعی نکاح کیس کی اگلی سماعت اڈیالہ جیل میں ہوگی اور جیل میں کیس کا اوپن ٹرائل ہوگا جس میں خاندان کے ا فراد اور شہری جو شرکت کرنا چاہیں جاسکتے ہیں جبکہ میڈیا نمائندے اور شہری سماعت کیلئے جیل رولزکے تحت سپرنٹنڈنٹ سے رابطہ کریں گے۔عدالت نے کیس کی مزید سماعت 22 دسمبر تک ملتوی کردی۔
