اسلام آباد ہائیکورٹ،عمران خان کے ایکس اکائونٹ پر پوسٹیں غیرقانونی قرار دینے کیلئے درخواست دائر
سزا یافتہ قیدی کے جیل میں قید کے دوران آفیشل اکائونٹ سے انتشاری پوسٹس غیر قانونی ہیں،شہری کی درخواست
اسلام آباد( ویب نیوز)
پاکستان تحریک انصاف (پی ٹی آئی)کے بانی عمران خان کے جیل میں قید کے دوران ایکس اکائونٹ پر پوسٹس کو انتشاری قرار دیتے ہوئے اسلام آباد ہائی کورٹ میں درخواست دائر کی گئی ہے کہ مذکورہ پوسٹس کو غیر قانونی قرار دیا جائے۔بیرسٹر ظفر اللہ ایڈوکیٹ کے ذریعے اسلام آباد ہائی کورٹ میں دائر درخواست میں شہری غلام مرتضی خان نے موقف اپنایا ہے کہ سزا یافتہ قیدی کے جیل میں قید کے دوران آفیشل اکائونٹ سے انتشاری پوسٹس غیر قانونی ہیں۔
انہوں نے استدعا کی ہے کہ نیشنل سائبر کرائم انوسٹی گیشن ایجنسی اور پی ٹی اے کو تحقیقات کر کے ایکس اکائونٹ چلانے والے کی نشاندہی کی ہدایت کی جائے اور بدنیتی پر مبنی غیر قانونی اور انتشاری مجرمانہ ٹوئٹس کو بلاک اور سوشل میڈیا سے ہٹانے کے احکامات دئیے جائیں۔درخواست میں کہا گیا ہے کہ جیل سپرنٹنڈنٹ کو ہدایات دی جائیں کہ سزا یافتہ قیدی کو جیل قوانین کے مطابق سوشل میڈیا چلانے کی اجازت نہ ہو اور جیل سپرنٹنڈنٹ کو فورا غیر قانونی اور غیر آئینی سرگرمیوں سے روکنے کے احکامات دئیے جائیں۔اسلام آباد ہائی کورٹ سے استدعا کی گئی ہے کہ پی ٹی آئی کو بانی پی ٹی آئی کے ایکس اکائونٹس سے کی گئی ٹوئٹس دوبارہ پھیلانے سے روکنے کا حکم دیا جائے۔
