آئین کے لیے آواز اٹھاتے رہیں گے،عدلیہ انصاف پر مبنی فیصلے کرے، وزیراعلی کے پی، پشاور جلسے میں خطاب
پنڈال میں موجود کارکنوںکی وزیراعلی کے خلاف نعرے بازی ، خطاب سننے سے انکار ،بوتلیں پھینکیں
پشاور( ویب نیوز)
خیبر پختونخوا کے وزیراعلی علی امین گنڈاپور نے کہا ہے کہ ہم نے آئین کے لئے آواز اٹھائی ہے اور آئین کے لیے آواز اٹھاتے رہیں گے، عدلیہ کو پیغام دیتے ہیں کہ آئین کے مطابق انصاف پر مبنی فیصلے کرے آئین کی پاس داری اس ملک میں سب پر فرض ہے۔پشاور میں پی ٹی آئی کے جلسہ عام سے خطاب کرتے ہوئے وزیراعلی کے پی نے کہا کہ بانی پی ٹی آئی کی جنگ حقیقی آزادی کی جنگ ہے، آج ہم اس عدلیہ کو ہدایت کرتے ہیں کہ آپ انصاف کے مطابق فیصلے کریں، آئین کی پاس داری اس ملک میں سب پر فرض ہے، ہم نے آئین کے لیے آواز اٹھائی ہے اور اٹھاتے رہیں گے، اس ملک میں سب سے زیادہ انسانی حقوق کی خلاف ورزی ہوئی۔انہوں نے کہا کہ انڈیا کے ساتھ جنگ میں بانی پی ٹی آئی نے واضح کیا کہ پوری قوم اکٹھی کھڑی ہے، خیبرپختونخوا کی حکومت آپریشن کے حق میں نہیں ہے۔انہوں نے مزید کہا کہ حقیقی آزادی عمران خان کا خواب ہے عدلیہ کو پیغام دیتے ہیں کہ آئین کے مطابق انصاف دے ، پنڈال میں موجود کارکنوں نے وزیراعلی کے خلاف نعرے بازی شروع کردی اور ان کا خطاب سننے سے انکار کردیا، کارکنوں نے وزیراعلی کے خلاف احتجاج کیا، پنڈال میں بوتلیں پھینکنی شروع کردیں، نہیں نہیں کے نعرے لگائے تاہم اس کے باوجود وزیراعلی نے اپنا خطاب جاری رکھا۔جلسے میں بدانتظامی جاری رہی اور کارکنان خواتین کے پنڈال میں گھس آئے، پولیس انہیں روکنے میں ناکام رہی جس پر خواتین پنڈال چھوڑ کر چلی گئیں۔پی ٹی آئی رہنما جنید اکبر نے جلسے سے خطاب میں کہا کہ کے پی پہلے بھی پی ٹی آئی کا تھا آج بھی ہے، ہم بانی پی ٹی آئی کے لئے لوگوں کے ہاتھ کاٹ دیں گے، جو لوگ کرسیوں پر بیٹھیں ہیں ان سے خون کے ایک ایک قطرے کا حساب لیں گے جو خان کا وفادار نہیں ہوگا میں اس پر زمین تنگ کردوں گا۔ انہوں نے مزید کہا کہ ہمیں کسی صورت آپریشن قبول نہیں۔
