پاک فوج کی پکتیکا میں کارروائی، گل بہادر گروپ کے کئی ٹھکانے تباہ، 70سے زائد دہشتگرد ہلاک
حملے میں 3خواتین، 2 بچے اور ایک جوان شہید ہوئے،سکیورٹی حکام
راولپنڈی ( ویب نیوز)
پاک فوج نے افغان صوبے پکتیکا میں کارروائی کے دوران گل بہادر گروپ کے کئی ٹھکانے تباہ کردئیے جس میں 70 سے زائد دہشتگرد ہلاک ہوگئے ۔میڈیا رپورٹس کے مطابق سیکیورٹی حکام نے بتایا کہ 17اکتوبر کی رات کو ایک انتہائی ٹارگٹڈ انداز میں گل بہادر گروپ کے پکتیکا کے علاقوں میں موجود دہشتگرد ٹھکانوں کو موثر انداز میں نشانہ بنایا گیا جس میں 70سے زائد دہشتگردوں کو ہلاک کر دیا گیا ۔سیکیورٹی حکام کے مطابق گل بہادر گروپ پاکستان میں دہشتگردی کی بڑی اور متعدد وارداتوں میں ملوث ہے اور افغانستان سے پاکستان میں داخل ہو کر دہشت گردانہ حملوں میں ملوث ہے، 17اکتوبر کو خادی، شمالی وزیرستان میں بھی اسی گروپ نے ناکام VBIED حملہ کیا جس میں 3 خواتین، 2 بچے اور ایک جوان شہید ہوئے۔ سیکیورٹی ذرائع کے مطابق17اکتوبر کی رات گل بہادر گروپ پر مستند اسٹرائیکس میں مارے جانے والے اہم سرغنوں میں دہشتگرد فرمان عرف الکرامہ شامل ہے ۔ صدیق اللہ داوڑ، غازی مداخیل، مقرب اور قسمت اللہ بھی ہلاک ہوئے، اس کے علاوہ دہشتگردوں کا سرغنہ گلاب عرف دیوانہ، رحمانی، عادل اور فضل الرحمان بھی ہلاک ہوئے۔ مارے جانے والا فضل الرحمان،گل بہادر کا قریبی رشتہ دار بھی ہے ۔ سیکیورٹی ذرائع کے مطابق دہشتگرد عاشق اللہ عرف کوثر اور یونس بھی اسٹرائیک میں اپنے انجام کو پہنچے، یہ تمام دہشتگرد گل بہادر کے اہم سرغنہ تھے اور ان کا مارا جانا ایک اہم اور بڑی کامیابی ہے ۔
