مولانا سید ابوالاعلیٰ مودودی ا42 واں یوم وفات آج (بدھ کو) منایا جائیگا
سید مودودی کا شمار اکیسویں صدی کی عظیم شخصیات میں ہوتا ہے،ترجمان جماعت اسلامی
لاہور(ویب نیوز) جماعت اسلامی کے بانی امیر،عالم اسلام کے عظیم مفکر ، داعی مولانا سید ابوالاعلیٰ مودودی کا42 واں یوم وفات آج 22ستمبر بروز بدھ کو منایا جائیگا اس سلسلہ میں ملک بھر کے چھوٹے بڑے شہروں قصبوں میں جماعت اسلامی اور ذیلی تنظیموں کے زیراہتمام تعزیتی ریفرنسز اورسیمینار ز کا انعقاد کیا جائیگا جن میں مقررین مولانا مودودی کی اسلام کیلئے خدمات پر روشنی ڈالیں گے ۔ جماعت اسلامی کے ترجمان قیصر شریف نے اپنے ایک بیان کہا کہ سید مودودی کا شمار اکیسویں صدی کی عظیم شخصیات میں ہوتا ہے۔ قیصر شریف نے کہا کہ مولانا مودودی وہ نابغہ روزگار شخصیت تھے جنہوں نے زندگی کا ہر لمحہ اسلام کی سربلندی ، امت کے اتحاد اور پاکستان کو قرآن وسنت کا گہوارہ بنانے میں صرف کیا۔
انہوں نے اسلامیان پاکستان سمیت امت کی رہنمائی کے لیے تحریری اورتقریری شکل میں عظیم ورثہ چھوڑا۔ جماعت اسلامی کاقیام ان کا لازوال کارنامہ ہے۔ انہوں نے کہا کہ جماعت اسلامی مولانا مودودی کی فکر کے مطابق پاکستان کو اسلامی فلاحی مملکت بنانے کی بھرپور جدوجہد کررہی ہے۔سید مودودی 25 ستمبر 1903 ء کو حیدر آباد دکن کے شہر اورنگ آباد میں پیدا ہوئے اور1906 تا 1913ء ابتدائی تعلیم کے مراحل سے گزرے۔1918 ء میں صرف پندرہ سال کی عمر میں انہوں نے صحافت کا آغاز ”اخبار مدینہ ” سے کیا۔ 1920 ء میں مولانا مودودی کے سر سے والد کا سایہ اٹھ گیا۔ 1925 ء میں ” الجمعیة ” دہلی کی ادارت سنبھال لی جو چار سال تک جاری رہی اور 1932 ء میں انہوں نے حیدر آباد دکن سے ماہنامہ ” ترجمان القرآن ” کا اجرا کیا۔ مولانا مودودی نے26 اگست 1941 ء کو لاہور میں جماعت اسلامی کی بنیاد رکھی۔11 مئی 1953 ء کو فوجی عدالت نے مولانا مودودی کو سزائے موت سنا دی۔ 1963 ء میں لاہور میں ان پر قاتلانہ حملہ ہوا۔1967 ء میں بحالی جمہوریت کے لیے دوسری جماعتوں سے مل کر تحریک جمہوریت پاکستان ( پی ڈی ایم) کی تشکیل کی۔1970 ء میں مولانا مودودی کے اعلان پر بے مثال یوم شوکت اسلام منایا گیا۔1973 ء میں 31 سال تک تحریک کی رہنمائی کرنے کے بعد مسلسل علالت کی وجہ سے جماعت اسلامی کی امارت سے معذرت کر لی۔1979 ء میں علاج کی غرض سے مولانا مودودی امریکہ گئے اور 22 ستمبر 1979 ء کو بفیلو ہسپتال امریکہ میں انتقال فرما گئے۔ان کی تدفین ان کی رہائش گاہ5اے ذیلدارپارک اچھرہ لاہور میں ہوئی ۔
#/S
