سموگ کی شدت برقرار؛ لاہور آج بھی دنیا کے آلودہ ترین شہروں میں سرفہرست
لاہور( ویب نیوز )
اسموگ نے لاہور کا پیچھا نہ چھوڑا اور دنیا کے آلودہ ترین شہروں میں آج پھر پہلے نمبر پر ہے۔ دنیا کے آلودہ ترین شہروں کی فہرست میں لاہور کا آج بھی پہلا نمبر ہے جہاں ائیرکوالٹی انڈیکس 349 ریکارڈ کیا گیا۔شہر کے علاقے کو ٹ لکھپت میں ائیر کوالٹی انڈیکس 542 ریکارڈ کیا گیا، ماڈل ٹاؤن میں 452، گلبرگ میں 446، انارکلی میں 424 ائیرکوالٹی انڈیکس ریکارڈ ہوا جب کہ فیصل آباد میں ائیر کوالٹی انڈیکس 364 اور گوجرانوالہ میں 258 ہے۔گزشتہ کئی روز سے فضائی آلودگی کی وجہ سے شہریوں کا گلے کی خرابی، نزلہ زکام اور کھانسی جیسے مسائل کا بھی سامنا ہے۔دوسری جانب محکمہ موسمیات کا کہنا ہے ملک کے بیشترحصوں پر براعظمی ہوائیں موجود ہیں۔ پنجاب میں آج اور کل موسم سرد اور خشک رہے گا۔ صوبے کے میدانی علاقوں میں صبح اور رات کے اوقات میں اسموگ اور دھند چھائے رہنے کا امکان ہے۔دنیا کے دیگر شہروں میں ویتنام کا شہر ہنوئی 231 ائیر کوالٹی انڈیکس کے ساتھ دوسرے جب کہ بھارتی شہر دہلی 201 ائیرکوالٹی انڈیکس کے ساتھ تیسرے نمبر پر ہے، بھارتی شہر کولکتہ چوتھے اور بنگلا دیشی شہر ڈھاکا پانچویں نمبر پر ہے۔
