زمان پارک آپریشن، رانا ثنا اللہ، مریم نواز، آئی جی پنجاب سمیت دیگر کو نوٹس عدالت نے اندراج مقدمہ کی درخواست پرسماعت 31 مارچ تک ملتوی کر دی

• سیشن کورٹ مریم نواز، رانا ثنا اللہ سمیت دیگر کے خلاف مقدمہ درج کرنے کا حکم دے،درخواست میں استدعا

لاہور (ویب نیوز)

عدالت نے پولیس کی جانب سے زمان پارک آپریشن کرنے کے معاملے پر پاکستان تحریک انصاف کی مریم نواز، رانا ثناء اللہ سمیت دیگر کے خلاف اندراج مقدمہ کی درخواست پر سماعت 31 مارچ تک ملتوی کر دی ۔ایڈیشل اینڈ سیشن جج حسنین رضا نے پولیس کی جانب سے زمان پارک آپریشن کرنے کے معالے پر پی ٹی آئی کی مریم نواز، رانا ثناء اللہ سمیت دیگر کے خلاف اندراج مقدمہ کی درخواست پر سماعت کی۔ عدالت نے کیس کی مزید سماعت 31 مارچ تک ملتوی کر دی۔عدالت نے رانا ثنا اللہ، مریم نواز، آئی پنجاب سمیت دیگر کو نوٹس جاری کرتے ہوئے جواب طلب کر رکھا ہے۔پی ٹی آئی نے درخواست زمان پارک کے کیئرٹیکر اویس نے لاہور بار کے صدر رانا انتظار کی وساطت سے دائر کی۔درخواست میں موقف اختیار کیا گیا کہ آئی جی پنجاب نے زمان پارک آپریشن مریم نواز اور رانا ثناء اللہ کے حکم پر کیا، زمان پارک آپریشن کر کے چادر چار دیواری کا تقدس پامال کیا گیا، پولیس کو واقعے پر مقدمہ درج کرنے کی درخواست دی لیکن مقدمہ درج نہیں کیا گیا۔درخواست میں استدعا کی گئی کہ سیشن کورٹ مریم نواز، رانا ثنا ء اللہ سمیت دیگر کے خلاف مقدمہ درج کرنے کا حکم دے۔