- پنجاب بھر میں 9 مئی کو 138 مقدمات میں 500 سے زائد خواتین اس وقت مطلوب ہیں
- فوجی تنصیبات پر حملوں میں ملوث خواتین کسی رعایت کی مستحق نہیں، ہر صورت گرفتار کیا جائے گا
لاہور (ویب نیوز)
نگراں وزیراعلی پنجاب محسن نقوی نے مرد پولیس کو خواتین کی گرفتاری سے روک دیا اور حملوں میں ملوث خواتین کی گرفتاری لیڈیز پولیس کے ہمراہ یقینی بنانے کی ہدایت کی۔محسن نقوی نے کہا کہ پنجاب بھر میں 9 مئی کو 138 مقدمات میں 500 سے زائد خواتین اس وقت مطلوب ہیں، فوجی تنصیبات پر حملوں میں ملوث خواتین کو ہر صورت گرفتار کیا جائے گا، فوجی تنصیبات پر حملوں میں ملوث خواتین کسی رعایت کی مستحق نہیں۔نگراں وزیراعلی پنجاب نے کہا کہ ان مقدمات میں ملوث خواتین کی گرفتاری لیڈیز پولیس کے ہمراہ یقینی بنائی جائے، کوشش کی جائے کہ گرفتار خواتین کو خواتین پولیس اسٹیشن میں رکھا جائے۔انہوں نے مزید کہا کہ انسداد دہشت گردی (اے ٹی سی)کی دفعات کے تحت درج ایف آئی آرز میں شامل خواتین کو بھی گرفتار کیا جائے گا، فوجی مقامات پر حملوں خاص طور پر جناح ہاؤس کے اندر اور باہر موجود خواتین سے لیڈیز پولیس اسٹیشن میں آکر خود گرفتاری دینے کی صورت میں رعایت برتنے کا فیصلہ کیا ہے۔
