اسلام آباد (ویب نیوز)
حکومت کی جانب سے آڈیو لیکس پر بنائے گئے کمیشن نے زیر تحقیق 9 آڈیوز کے ٹرانسکرپٹ جاری کردیے۔سپریم کورٹ کے جسٹس قاضی فائز عیسی کی سربراہی میں تین رکنی آڈیو کمیشن کی تحقیقات میں نیا موڑ آگیا ہے، کیوں کہ آڈیو لیکس کمیشن نے زیر تحقیق 9 آڈیوز کے ٹرانسکرپٹ جاری کردیے ہیں۔دوسری جانب پیمرا کے ڈپٹی ڈائریکٹر نے بھی مبینہ آڈیوز کے ٹرانسکرپٹ تیار کرکے ٹرانسکرپٹ کی تصدیق بھی کردی ہے۔جن آڈیوز کا ٹرانسکرپٹ جاری ہوا ہے ان میں سپریم کورٹ کے جج اور چوہدری پرویزالہی کے درمیان ہونے والی مبینہ گفتگو، عمران خان اورمسرت چیمہ کے درمیان مبینہ آڈیو، چیف جسٹس کی ساس اور وکیل طارق رحیم کی اہلیہ کے درمیان ہونے والی مبینہ آڈیو اور پرویز الہی اور ارشد جوجا ایڈووکیٹ کے درمیان ہونے والی مبینہ گفتگو شامل ہے۔کمیشن کی جانب سے سابق چیف جسٹس ثاقب نثار اور وکیل طارق رحیم کی مبینہ آڈیو کا ٹرانسکرپٹ بھی جاری کیا گیا ہے، جب کہ پرویزالہی اور صدرسپریم کورٹ بارعابد زبیری کے درمیان مبینہ آڈیو، فواد چوہدری اوران کے بھائی فیصل چوہدری کے درمیان ہونے والی مبینہ گفتگو اور ثاقب نثار کے بیٹے اور پی ٹی آئی رہنما کے درمیان مبینہ آڈیو کا ٹرانسکرپٹ جاری کیا گیا ہے۔ذرائع کے مطابق آڈیو لیکس میں شامل افراد کے ناموں کی فہرست تیار کرلی گئی ہے، اٹارنی جنرل آفس نے 8 مبینہ آڈیوز سے متعلق ناموں کی فہرست تیار کی ہے، اور اس فہرست میں پہلا نام سابق وزیراعلی پنجاب پرویزالہی کا ہے۔ذرائع کے مطابق فہرست میں چیئرمین تحریک انصاف عمران خان، سابق چیف جسٹس ثاقب نثار، موجودہ چیف جسٹس کی خوشدامن ماہ جیبیں نون، صحافی قیوم صدیقی اور تحریک انصاف کے رہنما جمشید چیمہ کے نام شامل ہیں۔ذرائع نے بتایا کہ حکومت کی تیار کردہ فہرست میں وکیل خواجہ طارق رحیم اور ان کی اہلیہ رافیہ طارق کا نام بھی ہے، فہرست میں صدر سپریم کورٹ بارعابد زبیری، سابق چیف جسٹس کے بیٹے نجم ثاقب اور ابو ذر مقصود چدھڑ کے مطابق علاوہ سپریم کورٹ کے ایک حاضرسروس جج کا نام بھی شامل ہے،واضح رہے کہ وفاقی حکومت نے مبینہ آڈیو لیکس کی تحقیقات کے لیے سپریم کورٹ کے سینئر ترین جج جسٹس قاضی فائز عیسی کی سربراہی میں تحقیقاتی کمیشن تشکیل دیا تھا، بعد ازاں جوڈیشل کمیشن کی تشکیل کے خلاف درخواستوں پر سپریم کورٹ نے لارجر بینچ بنایا، جس نے جمعہ کو سماعت کے دوران اٹارنی جنرل اور درخواست گزاروں کے دلائل سننے کے بعد فیصلہ محفوظ کرلیا ہے۔
