فیصل واوڈا کیس میں تسلیم کیا گیا غلطی ہوئی، نااہلی بنتی ہے مگر تاحیات نہیں، چیف جسٹس آف پاکستان الیکشن کمیشن کورٹ آف لا ء نہیں اس لیے نااہلی کا فیصلہ نہیں دے سکتا، وکیل فیصل واوڈا

فیصل واوڈا کیس میں تسلیم کیا گیا غلطی ہوئی، نااہلی بنتی ہے مگر تاحیات نہیں، چیف جسٹس آف پاکستان

الیکشن کمیشن کورٹ آف لا ء نہیں اس لیے نااہلی کا فیصلہ نہیں دے سکتا، وکیل فیصل واوڈا

تاحیات نااہلی صادق اور امین کے اصول پر پورا نہ اترنے پر ہوتی ہے،چیف جسٹس عمرعطا بندیال

 فیصل واوڈا کا سارا جھگڑا سینیٹ کی نشست کا ہے،وکیل نثار کھوڑو

فیصل واوڈا نے نہ حقائق چھپائے نہ کوئی بدیانتی کی،وکیل وسیم سجاد

 فیصل واوڈا نے کاغذات نامزدگی کب جمع کرائے،جسٹس منظور علی شاہ

فیصل واوڈا نے کاغذات نامزدگی 7 جون 2018 کو جمع کرائے،وکیل

 فیصل واوڈا کے وکیل کو الیکشن کمیشن کے دائرہ اختیار سے متعلق مزید تیاری کی ہدایت ،سماعت 13 اکتوبر تک ملتوی

اسلام آباد( ویب  نیوز)

چیف جسٹس آف پاکستان نے فیصل واوڈا کی تاحیات نااہلی کیخلاف میں ریمارکس دیتے ہوئے کہا کہ فیصل واوڈا کیس میں تسلیم کیا گیا غلطی ہوئی ،نااہلی بنتی ہے مگر تاحیات نہیں ۔جمعرات کو سپریم کورٹ آف پاکستان میں فیصل واوڈا کی تاحیات نااہلی کیخلاف کیس کی سماعت چیف جسٹس پاکستان کی سربراہی میں تین رکنی بنچ نے کی، چیف جسٹس عمر عطا بندیال نے ریمارکس دئیے کہ اس کیس میں تسلیم کیا گیا کہ غلطی ہوگئی نااہلی بنتی ہے مگر تاحیات نہیں۔وکیل فیصل واوڈا وسیم سجاد نے دلائل دئیے کہ الیکشن کمیشن کورٹ آف لا ء نہیں اس لیے نااہلی کا فیصلہ نہیں دے سکتا، چیف جسٹس  عمرعطا بندیال نے کہا کہ تاحیات نااہلی صادق اور امین کے اصول پر پورا نہ اترنے پر ہوتی ہے، اثاثے چھپانے یا غلطی کرنے پر آرٹیکل 63 ون سی کے تحت نااہلی ایک مدت تک ہوتی ہے،اس کیس میں تسلیم کیا گیا کہ غلطی ہوگئی نااہلی بنتی ہے مگر تاحیات نہیں۔ وکیل نثار کھوڑو فاروق ایچ نائیک نے کہا کہ فیصل واوڈا کا سارا جھگڑا سینیٹ کی نشست کا ہے، وکیل فیصل واوڈا وسیم سجاد نے کہا کہ فیصل واوڈا نے نہ حقائق چھپائے نہ کوئی بدیانتی کی۔جسٹس منصور علی شاہ نے سوال کیا کہ فیصل واوڈا نے کاغذات نامزدگی کب جمع کرائے؟ وکیل نے جواب دیا کہ فیصل واوڈا نے کاغذات نامزدگی 7 جون 2018 کو جمع کرائے اور ان پر سکروٹنی 18 جون کو ہوئی۔جسٹس منصور علی شاہ نے پوچھا کہ فیصل واوڈا نے بیان حلفی کب جمع کرایا تھا؟ وکیل نے بتایا کہ فیصل واوڈا نے بیان حلفی 11 جون 2018 کو جمع کرایا، ریٹرننگ افسر کو بتا دیا تھا کہ امریکی شہریت چھوڑ دی ہے، امریکن کونصلیٹ جا کر نائیکاپ کینسل کرایا۔جسٹس عائشہ ملک نے استفسار کیا کہ آپ نے کس تاریخ کو امریکی سفارت خانے میں جا کر نیشنیلٹی منسوخ کرائی؟ وکیل نے جواب دیا کہ امریکی سفارت خانے جا کر کہہ دیا تھا کہ نیشنیلٹی چھوڑ رہا ہوں۔ جسٹس منصور علی شاہ نے پوچھا کہ کیا آپ نے ایمبیسی جا کر زبانی بتا دیا کہ میرا پاسپورٹ کینسل کر دو؟ وکیل نے جواب دیا کہ امریکی شہریت چھوڑنے کا ثبوت میں نے تو نہیں دینا تھا، جسٹس منصور علی شاہ نے کہا کہ بیان حلفی 11 جون کو جمع کرانے سے پہلے آپ نے زحمت ہی نہیں کی کہ دوہری شہریت کا معاملہ ختم کریں؟ وکیل نے دلائل دئیے کہ نادرا نے 29 مئی 2018 کو امریکی شہریت کینسل ہونے کا سرٹیفکیٹ دیا تھا۔جسٹس عائشہ ملک نے سوال کیا کہ جب آپ نے امریکی سفارت خانے جا کر شہریت کینسل نہیں کرائی تو نادرا نے سرٹیفکیٹ کیسے جاری کر دیا؟۔عدالت نے فیصل واوڈا کے وکیل کو الیکشن کمیشن کے دائرہ اختیار سے متعلق مزید تیاری کی ہدایت کرتے ہوئے کیس کی سماعت 13 اکتوبر تک ملتوی کردی۔mk