اسلام آباد(ویب نیوز)
- مبینہ بیٹی چھپانے کا معاملہ: عمران خان کے خلاف درخواست خارج
- اسلام آباد ہائی کورٹ کے لارجر بینچ کا 31 صفحات پر مشتمل تفصیلی فیصلہ جاری
- بینچ میں شامل چیف جسٹس عامر فاروق نے اب تک اپنا فیصلہ جاری نہیں کیا
اسلام آباد ہائیکورٹ نے مبینہ بیٹی چھپانے کے الزام میں پاکستان تحریک انصاف چیئرمین عمران خان کے خلاف درخواست خارج کردی۔اسلام آباد ہائی کورٹ کے لارجر بینچ نے 31 صفحات پر مشتمل تفصیلی فیصلہ جاری کردیا۔ تاہم بینچ میں شامل چیف جسٹس عامر فاروق نے اب تک اپنا فیصلہ جاری نہیں کیا۔اسلام آباد ہائی کورٹ کے جسٹس محسن اختر کیانی اور جسٹس ارباب محمد طاہر نے عمران خان کے خلاف دائر درخواست خارج کی۔جسٹس ارباب محمد طاہر نے جسٹس محسن اختر کیانی کے فیصلے کی توثیق کی ہے۔پی ٹی آئی چیئرمین کے خلاف درخواست کو 3 ارکان پر مشتمل بینچ میں شامل 2 ججز نے خارج قرار دیا ہے۔خیال رہے کہ 2فروری 2023 کو اسلام آباد ہائی کورٹ نے کاغذات نامزدگی میں سابق وزیر اعظم عمران خان کی جانب سے اپنی مبینہ بیٹی ٹیریان جیڈ وائٹ کا ذکر نہ کرنے پر ان کی نااہلی کی درخواست پر لارجر بینچ تشکیل دینے کا فیصلہ کیا تھا۔یکم فروری کو سابق وزیر اعظم عمران خان نے اسلام آباد ہائی کورٹ میں اپنا جواب جمع کراتے ہوئے جج پر اعتراض کرتے ہوئے کیس خارج کرنے کی اپیل کی تھی۔درخواست گزار نے استدعا کر رکھی تھی کہ عدالت کاغذاتِ نامزدگی میں جھوٹ بولنے پر عمران خان کو آئین کے آرٹیکل 62 (ون) (ایف) کے تحت بطور رکنِ اسمبلی نااہل قرار دے۔کاغذات نامزدگی میں مبینہ بیٹی کو ظاہر نہ کرنے پر عمران خان کے خلاف نااہلی کیس کی چیف جسٹس عامر فاروق نے ساجد محمود کی جانب سے دائر درخواست پر سماعت کی تھی۔درخواست میں دعوی کیا گیا ہے کہ عمران خان نے برطانیہ میں ٹیریان وائٹ کی کفالت کے انتظامات کیے لیکن اپنے کاغذات نامزدگی میں اور الیکشن لڑنے کے حلف نامے میں اس کا ذکر نہیں کیا۔درخواست گزار کے وکیل کے طور پر پیش ہونے والے سابق اٹارنی جنرل سلمان اسلم بٹ نے عمران خان کی سابق اہلیہ جمائما خان کی جانب سے 18 نومبر 2004 کے ڈیکلیریشن پر مشتمل اضافی دستاویز پیش کی۔اس میں کہا گیا ہے کہ میں نے یہ ڈیکلیریشن ٹیریان جیڈ خان وائٹ کی درخواست کی حمایت میں کیا ہے جس میں اپیل کی گئی ہے کہ کیرولین وائٹ (ٹیریان کی والدہ اینا لوئیسا سیتا وائٹ کی بہن) کو ٹیریان کا سرپرست مقرر کیا جائے۔ڈیکلیریشن میں مزید کہا گیا ہے کہ جمائما خان نے ٹیریان جیڈ کے سرپرست کے طور پر خدمات انجام دینے سے انکار کردیا تھا اور سرپرستی کے لیے کیرولین وائٹ کا نام تجویز کیا تھا کیونکہ وہ سمجھتی تھیں کہ یہ ٹیریان کے بہترین مفاد اور خواہش کے مطابق ہے۔اینا لوئیسا (سیتا) وائٹ لارڈ گورڈن وائٹ کی بیٹی تھی جنہوں نے ایک بڑے صنعتی گروپ ہینسن پی ایل سی کی امریکی شاخ کی سربراہی کی۔درخواست گزار ساجد محمود نے الزام لگایا کہ پی ٹی آئی چیئرمین نے سیتا وائٹ سے شادی نہیں کی کیونکہ اس کے نسل پرست والد نے مدعا علیہ (عمران خان) کو دوٹوک انداز میں کہہ دیا تھا کہ اگر انہوں نے سیتا وائٹ سے شادی کی تو ان دونوں کو اس کی دولت میں سے ایک پیسہ بھی نہیں ملے گا۔اس کے بعد ہی عمران خان کی ملاقات ایک اور امیر خاتون جمائما سے ہوئی اور بہت ہی کم عرصے میں ان سے شادی کرلی۔درخواست میں ان حالات کا بھی ذکر کیا گیا جن میں ٹیریان جیڈ کی تحویل جمائما کو دی گئی تھی۔اس میں کہا گیا کہ اینا لوسیا وائٹ نے 27 فروری 2004 کی اپنی وصیت میں جمائما خان کو اپنی بیٹی ٹیریان جیڈ خان وائٹ کا سرپرست نامزد کیا تھا، بعد ازاں اسی برس 13 مئی کو سیتا وائٹ کا انتقال ہوگیا۔درخواست میں کہا گیا کہ جمائما گولڈ اسمتھ 1995 سے 2004 تک عمران خان کی شریک حیات تھیں۔درخواست میں کہا گیا ہے کہ چھپائے گئے حقائق کی تصدیق کیلیفورنیا کی ایک عدالت کی جانب کیے گئے فیصلے سے ہوئی جہاں یہ کہا گیا کہ مدعا علیہ (عمران خان) ٹیریان جیڈ کے والد ہیں۔اس میں مزید کہا گیا کہ عمران خان ابتدائی طور پر اپنے اٹارنی کے توسط سے کارروائی میں شامل ہوئے لیکن جب انہیں خون ٹیسٹ کرانے کا کہا گیا تو وہ کیس کی پیروی سے پیچھے ہٹ گئے۔پٹیشن میں الزام لگایا گیا ہے کہ بعد میں جب سیتا وائٹ کی بہن کیرولین وائٹ نے عدالت سے کہا کہ اسے ٹیریان کا سرپرست مقرر کیا جائے تو انہوں نے عدالت میں ڈیکلیریشن جمع کرایا۔
- ٹیریان کیس، اسلام آباد ہائیکورٹ کے ترجمان کی اہم وضاحت سامنے آگئی
- ابھی عمران خان کے خلاف ٹیریان نااہلی کیس کا فیصلہ جاری نہیں کیا گیا،
- کازلسٹ اجرا اور فریقین کو اطلاع دیے بغیر دو ججز کی رائے اپ لوڈ کی گئی۔ترجمان ہائی کورٹ
اسلام آبادہائی کورٹ میں زیر سماعت ٹیریان کیس کے فیصلے سے متعلق عدالت عالیہ کے ترجمان کی اہم وضاحت سامنے آگئی۔ چیف جسٹس کی سربراہی میں تین ججز پر مشتمل بنچ میں سے دو ججز کی جانب سے اپنی رائے ہائیکورٹ کی ویب سائٹ پر اپ لوڈ ہونے کے بعد ترجمان اسلام آباد ہائیکورٹ نے وضاحت جاری کردی اور دو ججز کی رائے کو ویب سائٹ سے بھی ہٹا دیا گیا۔جسٹس محسن اختر کیانی اور جسٹس ارباب محمد طاہر نے ویب سائٹ پر اپ لوڈ کی گئی اپنی 31 صفحات کی رائے میں کہا ہے کہ عمران خان کے خلاف ٹیریان کیس نا قابل سماعت ہے جبکہ اس میں چیف جسٹس عامر فاروق کی رائے شامل نہیں تھی۔ دو ججز کی رائے پہلے بنچ کے ممبر جسٹس محسن اختر کیانی کی ہدایت پر ویب سائٹ پر اپ لوڈ ہوئی پھر ہٹا دی گئی۔ترجمان ہائیکورٹ نے اس حوالے سے وضاحت جاری کرتے ہوئے کہا کہ ابھی عمران خان کے خلاف ٹیریان نااہلی کیس کا فیصلہ جاری نہیں کیا گیا، عمران خان کے خلاف نااہلی کی درخواست پر فیصلہ 30 مارچ کو محفوظ ہوا، کازلسٹ اجرا اور فریقین کو اطلاع دیے بغیر دو ججز کی رائے اپ لوڈ کی گئی۔ترجمان نے اپنی وضاحت میں مزید کہا کہ دو ججز کی رائے عدالتی فیصلہ نہیں ہے، کیسزسے متعلق دوججز کی رائے رولز کے خلاف ہے، کیس کی دوبارہ سماعت کے لیے نیا بنچ تشکیل دیا جارہا ہے، ویب سائٹ پر فیصلہ اپ لوڈ کرنے والوں کے خلاف کارروائی کی جائے گی۔۔
