چیف جسٹس آف پاکستان ہماری شکایات کا نوٹس لیں،شعیب شاہین
تاریخ کی بدترین دھاندلی دنیا دیکھ رہی ہے،الیکشن کمیشن نے ہمارے تحفظات پر کان نہیں دھرے
پولیس اہل کار بونے سیاست دانوں کے ہاتھوں کٹھ پتلی نہ بنیں،پریس کانفرنس سے خطاب
اسلام آباد (ویب نیوز)
پاکستان تحریک انصاف کے رہنما شعیب شاہین نے کہا ہے کہ چیف جسٹس آف پاکستان ہماری شکایات کا نوٹس لیں، نقصان ہوا تو ذمہ دار سپریم کورٹ بھی ہوگی۔پی ٹی آئی رہنما عامر مغل کے ہمراہ مشترکہ پریس کانفرنس کرنے والے شعیب شاہین نے کہا کہ گزشتہ دوسال سے پی ٹی آئی کیخلاف بدترین فسطائیت کادورچل رہا ہے، میرا حلقہ این اے 47 مقتدر حلقوں کے درمیان آتا ہے۔انہوں نے الزام عائد کیا کہ الیکشن کے دوران رکاوٹیں پیدا کی جارہی ہیں۔ پہلے ہم سے بلے کا نشان چھینا گیا۔ سپریم کورٹ نے لیول پلینگ فیلڈ کا حکم دیا لیکن الیکشن کمیشن نے ہمارے تحفظات پر کان نہیں دھرے۔پی ٹی آئی رہنما نے سوال اٹھایاکہ ، کیا نفرت کا ماحول پیدا کرکے پی ٹی آئی کی جگہ عوام کے دل سے چھین لیں گے ۔شعیب شاہین نے کہا کہ پولیس اہل کار پبلک سرونٹ یعنی ہمارے عوامی ملازم ہیں، پولیس والے بونے سیاست دانوں کے ہاتھوں کٹھ پتلی نہ بنیں۔انہوں نے مطالبہ کیا کہ چیف جسٹس آف پاکستان ہماری شکایات کا نوٹس لیں، تاریخ کی بدترین دھاندلی پوری دنیا دیکھ رہی ہے۔شعیب شاہین نے اپنے تحفظات بتاتے ہوئے واضح کیا کہ، اس کے نتیجے میں جو نقصان ہوگا اس کی ذمہ دار سپریم کورٹ بھی ہوگی۔
