سیلاب متاثرین کیلئے الخدمت ایک ارب10کروڑ40لاکھ روپے خرچ کرچکی ہے، ڈاکٹرحفیظ الرحمن
صدر الخدمت فاونڈیشن نے ریسکو و ریلیف سرگرمیوں بارے رپورٹ جاری کردی
لاہور(ویب نیوز)صدر الخدمت فاونڈیشن پاکستان پروفیسر ڈاکٹرحفیظ الرحمن کی زیر صدارت فلڈریسکیواینڈریلیف آپریشن کاجائزہ اجلاس منعقد ہوا۔سی ای او خبیب بلال نے پاکستان کے 58اضلاع میں سیلاب متاثرین کیلئے الخدمت کی امدادی سرگرمیوں پرشرکا کو بریفنگ دی۔ ڈاکٹرحفیظ الرحمن نے کہاکہ متاثرین کی خدمت پر اب تک ایک ارب 10کروڑ40لاکھ روپے خرچ کرچکے ہیں، پہلے مرحلے میں خیبر پختونخوا،پنجاب اورآزادکشمیر کے کم اضلاع متاثرہوئے،لیکن 15اگست سے سوات،بونیرودیگرعلاقوں میں کلاڈبرسٹ،بارشوں اوردریاں میں سیلابی صورتحال نے خیبرپختونخوا، پنجاب سمیت پورے پاکستان کومتاثرکیا،15اگست کی رات ہی ہنگامی اجلاس کے فوری بعد الخدمت کے ذمہ داران او ررضاکاروں نے ریسکیوآپریشن شروع کردیا تھا جو 40دنوں سے مسلسل جاری ہے۔ اس دوران ایمرجنسی ریسکیو آپریشنز میں 16 ہزار 421 رضاکاروں نے 31 کشتیاں اور 130 مشینری یونٹس کے ذریعے2 ہزار 161 آپریشنز مکمل کرکے 38 ہزار 606 افراد کو محفوظ مقامات پر منتقل کیا۔ 4 لاکھ 24 ہزار 51 فوڈ باکس تقسیم کئے اور 44 ہزار 695 خاندانوں کو فوڈ پیکجز فراہم کیے گئے۔متاثرین کیلئے 15خیمہ بستیا ں قائم کی گئیں جن میں 16ہزار327افرادکوکھانا، صاف پانی،میڈیکل کی سہولیات،بچوں کیلئے سکول اور پلے ایریاقائم کئے گئے ہیں جبکہ بعض خیمہ بستیوں میں مساجد،لائبریری کی سہولیات بھی فراہم کی جارہی ہیں۔ڈاکٹرحفیظ الرحمن نے کہاکہ ہیلتھ کے شعبے میں 8 موبائل ہیلتھ یونٹس، 767 میڈیکل کیمپس،60ایمبولینس کے ذریعے متاثرین کو ہیلتھ کی سہولیات فراہم کی گئیں جس میں کم وبیش دولاکھ زخمی اور مریض مستفید ہوئے۔ انھوں نے کہاکہ سیلاب سے متاثرہ علاقوں میں صاف پانی،سیوریج سمیت تمام انفراسٹرکچرتباہ ہوگیا، الخدمت کے واش پروگرام نے متاثرین کوصا ف پانی کی فوری فراہمی کیلئے متاثرین کو 3 لاکھ 59 ہزار 984 پانی کی بوتلیں، 4 ہزار 776 ہائی جین کٹس، 4 ہزار 23 ڈگنٹی کٹس،811 واٹر ٹینکس، 3 ہزار 869 جیری کین فراہم کئے۔ 12 موبائل فلٹریشن پلانٹس مسلسل متاثر ہ افراد کوصاف پانی کی فراہمی جاری رکھے ہوئے ہیں۔ڈاکٹرحفیظ الرحمن نے کہاکہ سیلاب سے متاثر ہ انسانوں کے علاوہ الخدمت فاونڈیشن نے جانوروں کے چار ے کیلئے بھی انتظام کیا اور128ٹرک چارہ متاثرہ علاقوں میں موجود جانورو ں کوفراہم کیا گیا۔ سیکرٹری جنرل سیدوقاص جعفری،نائب صدرسیداحسان اللہ وقاص،سی ای اوخبیب بلال،ڈائریکٹر پروگرام حماداختر، سینئرمنیجرمیڈیا اینڈمارکیٹنگ شعیب ہاشمی، منیجر ڈیزاسٹرمینجمنٹ آصف جمال،سینئر منیجر احمدقدیر سمیت دیگرشعبوں کے ذمہ داران بھی اجلاس میں شریک ہوئے
