اپوزیشن نے قانون ہاتھ میں لیا تو وہ سلوک کروں گا کہ تاریخ یاد رکھے گی۔ شیخ رشید احمد

جو پاک فوج کے خلاف بات کرے گا اس کی زبان گدی سے کھینچ لی جائے گی

مریم بی بی کو باہر جانے کی اجازت دی جائے تو ابھی ساری پی ڈی ایم ختم ہو سکتی ہے، وزیر داخلہ کا یکجہتی کشمیر ریلی سے خطاب

راولپنڈی ( ویب نیوز)وزیر داخلہ شیخ رشید احمد نے کہا ہے کہ اپوزیشن کو خبردار کیاہے کہ اگر انہوں نے قانون کو ہاتھ میں لیا تو ان سے وہ سلوک کروں گا کہ تاریخ یاد رکھے گی۔  جو پاک فوج کے خلاف بات کرے گا اس کی زبان گدی سے کھینچ لی جائے گی،اگر مریم بی بی کو باہر جانے کی اجازت دے دی جائے تو ابھی ساری پاکستان ڈیمو کریٹک موومنٹ(پی ڈی ایم) ختم ہو سکتی ہے۔راولپنڈی میں یکجہتی کشمیر ریلی سے خطاب کرتے ہوئے شیخ رشید احمد نے کہا کہ کشمیر کی جدوجہد آزادی کو ہم سلام پیش کرتے ہیں۔ان کا کہنا تھا کہ جب کوئی تاریخ لکھے گا تو کشمیر کی جدوجہد آزادی میں لال حویلی میں لال حویلی کا ایک کردار ہے اور جب بھی پاکستان پر وقت آیا تو لال حویلی اپنی عظیم افواج کے قائد قمر جاوید باجوہ اور دوسرے لوگوں کے ساتھ مل کر اپنی جان ہتھیلی پر رکھ کر پاکستان کا دفاع کرے گا۔انہوں نے کہا کہ آج مسلمانوں کے ساتھ ہندوستان میں جو سلوک کیا جا رہا ہے اور میں کشمیریوں کو یہ کہنا چاہتا ہوں کہ راولپنڈی شہر کا تعلق چاہے کسی پارٹی سے کیوں نہ ہو لیکن یہ غیرت مندوں کا شہر ہے اور کشمیر کی آزادی کے لیے ہمہ وقت تیار ہے۔شیخ رشید نے کہا کہ میں نے آپ کہا تھا کہ یہ استعفے نہیں دیں گے، اچھی بات ہے مت دو، میں نے آپ سے کہا تھا کہ یہ سینیٹ کا الیکشن لڑیں گے لیکن مجھ دکھ ہے کہ جس اسمبلی پر مولانا فضل الرحن نے لعنت بھیجی ہے، آج اسی اسمبلی سے اپنے اراکین کے لیے ووٹ مانگنے جائیں گے۔ان کا کہنا تھا کہ یہ ہمیں کہتے ہیں یوٹرن لیتے ہیں لیکن تم تو ‘اباوٹ ٹرن’ لیتے ہو، ہمیں یوٹرن کا طعنہ دینے والو تم تو اباٹ ٹرن لیتے ہوں، اب یہ 26مارچ کو لانگ مارچ لے گئے ہیں، آ جائیں۔انہوں نے کہا کہ میری بحیثیت وزیر داخلہ پوری کوشش ہو گی کہ ہم آپ کے راستے میں کوئی رکاوٹیں کھڑی نہ کریں لیکن اگر آپ نے قانون کو ہاتھ میں لیا تو یاد رکھنا آپ سے وہ سلوک کروں گا کہ تاریخ یاد رکھے گی۔ان کا کہنا تھا کہ آپ ہمارے سیاسی مخالف ہیں لیکن ہم آپ سے کہنا چاہتے ہیں کہ 26 مارچ میں دو مہینے پڑے ہیں، ہم اپوزیشن کے لیے کوئی رکاوٹ کا باعث نہیں بننا چاہتے ہیں۔وزیر داخلہ نے اپوزیشن جماعتوں کو مخاطب کرتے ہوئے کہاکہ تین سال گزرنے والے ہیں، ایک سال کے بعد الیکشن مہم شروع ہو جائے گی، کیا تم اس ملک میں سیاسی انتشار پھیلانا چاہتے ہو۔انہوں نے کہ فضل الرحمن صاحب آپ کن بچوں کے گھیرے میں آ گئے ہیں، آپ اچھے بھلے سمجھدار آدمی ہیں، آپ دیکھیں آصف زرداری کتنا بڑا گرو نکلا ہے، ان کی ضمانت کنفرم کیونکہ اس نے کہا ہے کہ کیس کراچی بھیج دو تو کوئی اس کے خلاف شہادت ہی دے گا۔ان کاکہنا تھا کہ اگر آصف زرداری کے کیس کراچی جائیں گے تو کون ان کے خلاف شہادت دے گا کیونکہ جب یہ جیل میں تھے تو سارے پاکستان کے بدمعاشوں کا نیٹ ورک اس نے بنایا ہوا تھا، جیلوں کا نیٹ ورک اس نے بنایا ہوا تھا۔شیخ رشید احمد نے کہا کہ مجھے دکھ اس بات کا ہے کہ مسلم لیگ(ن)گھیرے میں ہے، آج شہباز شریف کا کیس سنجیدہ ہے، یہ جیل جاتے ہیں تو ان کی صحت خراب ہو جاتی ہے، جیل ان کو راس نہیں آتی، یہ اپوزیشن میں ہوں تو ان کا دل کرتا ہے کہ باہر جائیں۔انہوں نے دعوی کیا کہ اگر آج مریم بی بی کو باہر جانے کی اجازت دے دی جائے تو ساری پی ڈی ایم ختم ہو سکتی ہے، میں سارے پاکستان کو چیلنج کرتا ہوں، ایک ہی مطالبہ ہے کہ ہمیں بھی جانے دو۔ان کا کہنا تھا کہ تم عمران خان کی حکومت پر ختم نبوت کا طعنہ دیتے ہو، شرم کرو، اس پاکستان میں کوئی شخص ثابت کرو جس نے اللہ کے نبی اور ناموس رسالتۖ کے لیے مجھ سے زیادہ جیل کاٹی ہو تو جو چور کی سزا وہ میری سزا۔انہوں نے کہا کہ میں دین کی طاقتوں کو حکومت کے خلاف استعمال نہیں ہونے دوں گا، تحریک لبیک اور میرا مشن ایک ہے، میں ناموس رسالتۖ کا سپاہی ہوں، یہ فضل الرحمن اور اور ن لیگ نے تحریک نبوت کے خلاف اسمبلی میں ووٹ دیا، اگر یہ غلط ثابت ہو تو مجھے پکڑ لو۔وزیر داخلہ نے پی ڈی ایم کو مخاطب کرتے ہوئے کہا کہ آپ چار مہینوں سے قوم کا وقت ضائع کررہے ہیں، بند گلی میں داخل ہیں، بالآخر ہم سے مذاکرات کرنے ہڑیں اور میں پی ڈی ایم کو دعوت دیتا ہوں کہ آئیں اور ہم سے مذاکرات کریں، لوگوں کو مت تھکائیں، دو مہینے بعد آپ کا وہی حشر ہو گا جو الیکشن کمیشن کے باہر ہوا۔انہوں نے کہا کہ پیپلز پارٹی اور فضل الرحمن اپنا راستہ بند گلی سے کھلی گلی میں لے آئے ہیں اور ن لیگ کو وہیں بیچ چوراہے میں چھوڑ دیں گے، اگر کوئی یہ سمجھ رہا ہے کہ یہ قوم پاک فوج کے خلاف کوئی بات سن سکتی ہے تو سنو پنڈی کا اعلان ہے کہ جو پاک فوج کے خلاف بات کرے گا اس کی زبان گدی سے کھینچ لی جائے گی۔ان کا کہنا تھا کہ جو لوگ یہ کہتے تھے کہ عمران خان کی حکومت جا رہی ہے تو کان کھول کر سن لو کہ آپ جیسی اپوزیشن نالائق اپوزیشن ہو، آپ جیسے کم عقل اپوزیشن لیڈر ہوں تو عمران خان یہ ہی نہیں بلکہ اگلے 5سال بھی حکومت میں رہے گا