گلے پڑنے کے بیانیہ والے اب پائوں پڑنے کے بیانیہ پر آگئے، حافظ حسین احمد
شہباز شریف نے پی ڈی ایم کو اسٹیبلشمنٹ مخالف بیانیہ سے ہٹا کر مفاہمانہ بیانیہ پر لاکھڑاکردیا
لانگ مارچ اور اجتماعی استعفے دینے کی دعوایدار پی ڈی ایم اب محض جلسوں کا اعلان ہی کرسکی
اڈیالہ جیل میں پاں پڑنے کی پریکٹس کرنے والے شہباز شریف نے پوری پی ڈی ایم کوپائوں پڑنے پر آمادہ کرلیا
نوازشریف کے ماضی کے جدہ اورسعودی عرب کے تجربے کو مدنظر رکھتے ہوئے اب مفاہمانہ خاکے میں برٹش رنگ بھرا جائے گا
سازش کے تحت لانگ مارچ اور استعفوں کا بہانے بنا کر پیپلز پارٹی اور اے این پی کو نکال کر پی ڈی ایم پر قبضہ کیا گیا
مسلم لیگ ن کے تلوں میں تیل نہیں یہ صرف اپنے معاملات کو سیدھا کرنے کے لیے اپوزیشن کی جماعتوں کو استعمال کرتے ہیں، میڈیا اور مختلف وفود سے گفتگو
کوئٹہ/اسلام آباد /کراچی (ویب نیوز)جمعیت علما اسلام پاکستان کے سینئر رہنما اور ممتاز پارلیمنٹرین حافظ حسین احمد نے کہا کہ پی ڈی ایم کے 29 مئی کے اجلاس میں اگرچہ مسلم لیگ ن کے نمائشی سربراہ اور قومی اسمبلی میں قائد حزب اختلاف میاں شہباز شریف مہمان اداکار کے طور پر شرکت نے پی ڈی ایم کے رینٹل صدر مولانا فضل الرحمن کو میاں نوازشریف کے اسٹیبلشمنٹ مخالف بیانیہ کے بجائے میاں شہباز شریف کا اسٹیبلشمنٹ کی ساتھ مفاہمانہ بیانیہ کے حوالے سے استعفوں اور لانگ مارچ کے بجائے محض جلسوں کا اعلان کر سکے۔ وہ اتوار کو اپنی رہائشگاہ جامعہ مطلع العلوم میں گفتگو کررہے تھے۔ انہوں نے کہا کہ شہبازشریف نے کامران خان سے اپنے انٹرویو میں واضح طور پراعتراف کرتے ہوئے کہا کہ آج بھی اپنے مفاہمانہ بیانیہ پر نہ صرف قائم ہوں بلکہ اگر مجھے لندن جانے دیا جائے تو میں میاں نوازشریف کو اپنے مفاہمانہ بیانیہ پر قائل کرنے میں ضرور کامیاب ہوں گا چاہے اس کے لیے مجھے میاں نواز شریف کے پائوں پڑنا پڑے اس سے واضح ہو تا ہے کہ اڈیالہ جیل میں پائوں پڑنے کی کافی پریکٹس کی گئی ہے اور اس کے نتیجے میں عدلیہ کی بیساکھیوں کو استعمال کر کے ایک دن میں سارے معاملات نمٹا کر اور عمران خان نیازی کی سعودی عرب سے واپسی سے پہلے چھوٹے میاں شہباز شریف سے فوری طور پر بڑے میاں نوازشریف سے بالمشافہ ملاقات ہو اور ذہنی تربیت سیاسی بالغان کی انسٹیٹیوٹ اڈیالہ میں مجوزہ این آر اوکے طے شدہ خاکے میں نواز شریف کے ماضی کے جدہ، سعودی عرب کے تجربہ کو مد نظر رکھتے ہوئے اب مفاہمانہ خاکے میں برٹش رنگ بھرا جاسکے اس لیے رینٹل صدر بھی اپنے طے شدہ حصہ کی مزید یقین دہانی کے بعد استعفوں اور رینٹل مارچ کے حوالے سے سوا ارب روپے کی فراہمی کی باوجود 29 مئی کے اجلاس میں نہ لانگ مارچ اور نہ اجتماعی استعفوں کو جس کا بہانہ بناکر مولانا فضل الرحمن اور محترمہ مریم نواز کی مشترکہ سازش کے تحت پیپلزپارٹی اور اے این پی کو دھکا دیکر ان دونوں جماعتوں کو باہر کرکے پی ڈی اہم پر قبضہ کر لیا۔حافظ حسین احمد نے کہا کہ میں پہلے ہی کہہ چکا ہوں کہ مسلم لیگ ن کے تلوں میں تیل نہیں یہ صرف اپنے معاملات کو سیدھا کرنے کے لیے اپوزیشن کی جماعتوں کو استعمال کررہے ہیں اب اپنے معاملات کو سیدھا کرکے پہلی قسط میں پیپلز پارٹی اور اے این پی کو نکالا گیا اب اگلی قسط میں پی ڈی ایم کے نمائشی سربراہ کو باہر نکالا جائے گا۔
