افغانستان میں6.1شدت کا خوفناک زلزلہ،950 افراد جاں بحق،600سے زائد زخمی
ہلاکتوں میں اضافے کا خدشہ ہے کیونکہ کہ دوردراز علاقوں کی تفصیلات اکٹھی کی جارہی ہیں،وزارت داخلہ
پکتیا اور خوست سب سے زیادہ متاثر ہوا ،سینکڑوں گھر ملبے کا ڈھیر بن گئے، کئی افراد ملبے تلے دبے ہوئے ،ہلاکتوں میں اضافے کا خدشہ، ذبیح اللہ مجاہد
پاکستان اور بھارت میں بھی زلزلہ محسوس کیا گیا ، زلزلے کا مرکز خوست شہر سے 27 میل دور تھا،زیر زمین اس کی گہرائی 51کلو میٹر تھی ،امریکی جیولوجیکل سروے
کابل (ویب نیوز)
مشرقی افغانستان میں6.1شدت کے خوفناک زلزلے نے تباہی مچادی، پکتیا اور خوست میں زلزلے کے باعث950 افرادجاں بحق اور600 سے زائد زخمی ہو گئے ، جبکہ سینکڑوں گھر ملبے کا ڈھیر بن گئے ہیں ،ہلاکتوں میں اضافے کا خدشہ ہے ،زلزلے کی شدت پاکستان اور بھارت میں بھی محسوس کی گئی۔افغانستان کے ڈیزاسٹر مینجمنٹ کے نائب وزیر شرف الدین مسلم نے ملک کے مختلف علاقوں میں زلزلے سے 950افراد کی اموات کی تصدیق کردی اور کہا کہ 600 سے زائد افراد کے زخمی ہونے کی اطلاعات ہیں۔ زلزلے سے سب سے زیادہ تباہی صوبہ پکتیکا میں ہوئی جہاں اب تک کی اطلاعات کے مطابق 100 سے زائد افراد جاں بحق اور 250زخمی ہوچکے ہیں۔وزارت داخلہ کے اہلکار صلاح الدین ایوبی نے بتایا کہ ہلاکتوں میں اضافے کا خدشہ ہے کیونکہ کہ دوردراز علاقوں کی تفصیلات اکٹھی کی جارہی ہیں۔افغان طالبان کے ترجمان اور نائب وزیر اطلاعات ذبیح اللہ مجاہد نے میڈیاسے گفتگو کرتے ہوئے بتایا کہ کابل سمیت افغانستان کے مختلف حصوں میں رات گئے6.1شدت کا زلزلہ آیا، پکتیا اور خوست سب سے زیادہ متاثر ہوا جبکہ سینکڑوں گھر بری طرح متاثر ہوئے۔ذبیح اللہ مجاہد نے بتایا کہ ننگرہار، لغمان،غزنی، میدان وردک، لوگر،خوست میں بھی زلزلے کے جھٹکے محسوس کیے گئے، زلزلے کے نتیجے میں اب بھی کئی افراد ملبے تلے دبے ہوئے ہیں متاثرہ امدادی کارروائیاں جاری ہیں۔رپورٹس کے مطابق زلزلے کے جھٹکے افغانستان کے 500 کلو میٹر سے زائد علاقوں میں محسوس کیے گئے جس کے نتیجے میں پاکستان اور بھارت کے کئی علاقوں میں بھی زلزلہ محسوس کیا گیا جبکہ دارالحکومت کابل میں بھی زلزلے کے شدید جھٹکے محسوس کیے گئے۔امریکی جیولوجیکل سروے کے مطابق زلزلے کی شدت 6.1تھی اور زلزلے کا مرکز خوست شہر سے 27 میل دور تھا،زیر زمین اس کی گہرائی 51کلو میٹر تھی جب کہ زلزلہ رات گئے محسوس کیا گیا۔ افغان حکام کے مطابق زلزلے سے متاثرہ علاقوں میں فوری طور پر امدادی ٹیموں کو بھیجا گیا ہے۔اس سے قبل وفاقی دارالحکومت اسلام آباد، پنجاب اور پشاور سمیت شمالی علاقوں میں زلزلے کے شدید جھٹکے محسوس کیے گئے تھے، زلزلہ پیما مرکز کے مطابق زلزلے کی شدت 5.9، گہرائی 40 کلو میٹر تھی، جب کہ زلزلے کا مرکز وسطی افغانستان تھا۔شہریوں کے مطابق زلزلے کے جھٹکے 30 سے 40 سیکنڈز تک محسوس کیے گئے، تاحال زلزلے کے باعث کسی جانی و مالی نقصان کی اطلاع نہیں ملی۔واضح رہے کہ چند روز کے دوران پاکستان میں شدید زلزلے کا دوسرا واقعہ ہے اس سے قبل جمعے کو بھی وفاقی دارالحکومت سمیت ملک کے مختلف شہروں میں شدت کا زلزلہ آیا تھاجس نے خوف وہراس پھیلا دیا تھا۔
