لاہور ہائی کورٹ ، صحافی عمران ریاض کی بازیابی کیلئے آئی جی پنجاب کو آخری مہلت پانچ ماہ سے آپ کی باتیں صبر سے سن رہا ہوں، مگر اب صبر کا پیمانہ ختم ہو رہا ہے،چیف جسٹس لاہورہائیکورٹ

لاہور ہائی کورٹ ، صحافی عمران ریاض کی بازیابی کیلئے آئی جی پنجاب کو آخری مہلت

آئی جی پنجاب عدالت کے روبرو پیش ہوئے اور عمران ریاض کی بازیابی کے لئے مہلت مانگی

پانچ ماہ سے آپ کی باتیں صبر سے سن رہا ہوں، مگر اب صبر کا پیمانہ ختم ہو رہا ہے،چیف جسٹس لاہورہائیکورٹ

عمران ریاض کو اغوا کرلیا گیا ہے، عدالت بازیاب کرنے کا حکم دے،درخواست گزار کا حکم

عدالت نے عمران ریاض کی بازیابی سے متعلق کیس کی مزید سماعت 26 ستمبر تک ملتوی کردی

لاہور ( ویب  نیوز)

لاہور ہائی کورٹ نے صحافی عمران ریاض کی بازیابی کیلئے آئی جی پنجاب کو آخری مہلت دے دی ۔بدھ کو چیف جسٹس لاہور ہائی کورٹ نے صحافی عمران ریاض کے والد کی درخواست پر سماعت کی۔ آئی جی پنجاب ڈاکٹر عثمان انور عدالت کے روبرو پیش ہوئے اور عمران ریاض کی بازیابی کے لئے مہلت مانگی۔ چیف جسٹس لاہورہائیکورٹ نے آئی جی پنجاب پر برہمی کا اظہار کرتے ہوئے کہا کہ پانچ ماہ سے آپ کی باتیں صبر سے سن رہا ہوں، مگر اب صبر کا پیمانہ ختم ہو رہا ہے۔چیف جسٹس لاہور ہائی کورٹ نے درخواست گزار کے وکیل میاں ولی اشفاق سے استفسار کیا کہ اگر اپ رضامند ہیں تو میں مہلت دے دیتا ہوں جس پر علی اشفاق نے آئی جی کو مہلت دینے پر رضا مندی ظاہر کر دی۔درخواست گزار نے موقف اختیار کیا کہ ان کے بیٹے عمران ریاض کو اغوا کرلیا گیا ، عدالت بازیاب کرنے کا حکم دے۔عدالت نے آئی جی پنجاب سے استفسار کیا کہ عمران ریاض کی بازیابی کے لئے کیا پیشرفت ہوئی، جس پر ڈاکٹر عثمان انور نے بتایا کہ ہم نے عدالتی احکامات پر عمران ریاض کے والد سے ملاقات کی اور انہیں تمام پیشرفت سے آگاہ کیا، معاملے پر ٹھیک ڈائریکشن پر جا رہے ہیں۔عدالت نے عمران ریاض کی بازیابی سے متعلق کیس کی مزید سماعت 26 ستمبر تک ملتوی کردی۔