نوجوان پاکستان کے مستقبل کے رہنما ہیں،طلبا ء خود کو ملک کی ترقی میں مثبت کردار ادا کرنے کے قابل بنائیں،
آرمی چیف نے طلبہ سے ملاقات کے دوران پاکستان پر بیرونی ماحول کے اثرات خصوصا سرحد پار دہشت گردی کے خطرے پر روشنی ڈالی،آئی ایس پی آر
راولپنڈی( ویب نیوز)
آرمی چیف جنرل سید عاصم منیر نے نوجوانوں کو پاکستان کا اصل سرمایہ اور مستقبل قراردیتے ہوئے کہا ہے کہ طلباء ہنر سیکھ کر خود کو ملک کی ترقی میں مثبت کردار ادا کرنے کے قابل بنائیں۔پاک فوج کے شعبہ تعلقات عامہ (آئی ایس پی آر) کی جانب سے جاری اعلامیے کے مطابق آرمی چیف جنرل سید عاصم منیر نے پاکستان بھر سے آئے ہوئے یونیورسٹیز اور کالجز کے نوجوان طلبا کے اجتماع سے خطاب کیا ہے۔آئی ایس پی آر کے مطابق نوجوانوں سے ملاقات اور خطاب کے دوران آرمی چیف نے طلبا کی حوصلہ افزائی کی کہ وہ اپنے تعلیمی کیریئر میں بہترین کارکردگی کا مظاہرہ کریں اور ایسے ہنر سیکھیںجو انہیں ملک کی ترقی میں مثبت کردار ادا کرنے کے قابل بنائیں۔اعلامیے کے مطابق آرمی چیف نے پاکستان پر خطرات اور ان کے اثرات بالخصوص سرحد پار دہشتگردی کے خطرے کے بارے میں بھی اپنے خیالات کا اظہار کیا۔آئی ایس پی آر کے مطابق آرمی چیف نے نوجوانوں کی توانائی، تخلیقی صلاحیت اور جدت طرازی کی صلاحیت کی بھی تعریف کرتے ہوئے کہا کہ نوجوان پاکستان کے مستقبل کے رہنما ہیں۔آرمی چیف نے ملک کی خودمختاری اور علاقائی سالمیت کے تحفظ میں پاک فوج کے کردار پر روشنی ڈالی اور دہشتگردی کی لعنت کے خلاف قومی جدوجہد میں پاکستانی عوام ، فوج اور امن و امان قائم کرنیوالے اداروں کی قربانیوں کو اور کاشوں کو خراج تحسین پیش کیا ۔آئی ایس پی آر کے مطابق آرمی چیف نے پاکستانیت کو اپنانے کی ضرورت پر زور دیتے ہوئے نوجوان کی فکری نشوونما کے لیے پاکستان کی تاریخ، ثقافت اور اقدار کی اہمیت پر بھی روشنی ڈالی
