اوورسیز پاکستانیوں نے ایک بار پھر 2 ارب ڈالرز سے زائد بھیج دیئے،اسٹیٹ بینک
ستمبر میں سعودی عرب سے 69 کروڑ ڈالر، متحدہ عرب امارات سے 50 کروڑ اور برطانیہ سے 37 کروڑ ڈالر بھیجے گئے
اسلام آباد( ویب نیوز)اسٹیٹ بینک آف پاکستان کے اعداد و شمار کے مطابق اوورسیز پاکستانیوں نے مسلسل 16ویں ماہ 2 ارب ڈالر سے زائد رقوم بھیجی ہیں۔ایس بی پی کے مطابق رواں سال ستمبر میں ترسیلات 2 ارب 66 کروڑ ڈالر رہیں۔اعداد و شمار کے مطابق ستمبر میں سعودی عرب سے 69 کروڑ ڈالر، متحدہ عرب امارات سے 50 کروڑ اور برطانیہ سے 37 کروڑ ڈالر بھیجے گئے۔ایس بی پی کے مطابق رواں مالی سال کی پہلی سہ ماہی میں ترسیلات 8 ارب 3 کروڑ ڈالر رہیں، یوں اس دورانیے میں ورکرز ترسیلات کی ماہانہ اوسط 2اعشاریہ67 ارب ڈالر رہیں۔اسٹیٹ بینک کے مطابق 3 ماہ میں سعودی عرب میں مقیم پاکستانیوں نے 2 ارب 2 کروڑ، یو اے ای میں مقیم پاکستانیوں نے 1اعشاریہ 54 ارب اور برطانیہ سے 1 اعشاریہ 11 ارب ڈالرز پاکستان بھیجے۔ایس بی پی کے اعداد و شمار کے مطابق یورپی یونین میں مقیم پاکستانیوں نے 3 ماہ میں 89 کروڑ ڈالر، دیگر خلیجی ممالک سے 3 ماہ میں 88 کروڑ ڈالر اور امریکا میں مقیم پاکستانیوں نے83 کروڑ ڈالر 3 ماہ میں بھیجے ہیں۔
