سیکیورٹی فورسز کا لوئر دیر میں آپریشن، 10دہشتگرد ہلاک، 7 جوان شہید
سکیورٹی فورسز ملک سے بھارتی سرپرستی میں دہشتگردی کے ناسور کو جڑ سے اکھاڑنے کیلئے پرعزم ہیں،آئی ایس پی آر
راولپنڈی( ویب نیوز)
پاک فوج کے شعبہ تعلقات عامہ کے مطابق سکیورٹی فورسز نے لوئر دیر میں آپریشن کے دوران 10دہشتگردوں کو ہلاک کر دیا ، کارروائی میں 7جوان شہید ہوئے۔ آئی ایس پی آر کے مطابق سکیورٹی فورسز نے لوئر دیر کے علاقہ لال قلعہ میں آپریشن کیا، کارروائی دہشتگردوں کی موجودگی کی اطلاع پر کی گئی۔ پاک فوج کے شعبہ تعلقات عامہ کے مطابق شدید فائرنگ کے تبادلے میں 10 دہشتگرد ہلاک ہوگئے جبکہ فائرنگ کے تبادلے میں 7بہادر سپوت وطن پر قربان ہو گئے۔ آئی ایس پی آر کے مطابق شہدا میں نائیک عبدالجلیل، نائیک گل جان اور لانس نائیک عظمت اللہ شامل ہیں، سپاہی عبدالمالک، محمد امجد، محمد داد اور سپاہی فضل قیوم بھی شہید ہوئے۔ پاک فوج کے شعبہ تعلقات عامہ کے مطابق شہید اہلکاروں نے دہشتگردوں کے ہاتھوں یرغمال شہریوں کو چھڑانے کی کوشش میں جان کا نذرانہ دیا۔ آئی ایس پی آر کے مطابق خفیہ اطلاعات میں ان گھنائونے واقعات میں افغان شہریوں کے براہِ راست ملوث ہونے کی تصدیق کی۔ پاک فوج کے شعبہ تعلقات عامہ کے مطابق پاکستان کو توقع ہے عبوری افغان حکومت اپنی ذمہ داریاں نبھائے گی۔ امید ہے افغان حکومت اپنی سرزمین پاکستان مخالف سرگرمیوں کیلئے استعمال نہیں ہونے دے گی۔ آئی ایس پی آر کے مطابق علاقے میں بھارتی حمایت یافتہ دیگر دہشتگردوں کے خاتمے کیلئے سینی ٹائزیشن آپریشن جاری ہے، سکیورٹی فورسز ملک سے بھارتی سرپرستی میں دہشتگردی کے ناسور کو جڑ سے اکھاڑنے کیلئے پرعزم ہیں۔ پاک فوج کے شعبہ تعلقات عامہ کے مطابق ہمارے بہادر جوانوں کی ایسی قربانیاں ہمارے عزم کو مزید مضبوط کرتی ہیں۔
