عید کی 10 چھٹیوں سے صنعت کو بہت نقصان ہو گا: زبیر موتی والا

کراچی (ویب ڈیسک)

کراچی چیمبر آف کامرس کے بزنس مین گروپ کے چیئرمین زبیر موتی والا کا کہنا ہے کہ عید الفطر کی تعطیلات کے سلسلے میں 10 دن صنعت بند ہو گی تو انڈسٹری کو بہت نقصان ہو گا۔

عید الفطر کی تعطیلات کے حوالے سے کراچی چیمبر آف کامرس کی پریس کانفرنس سے خطاب کرتے ہوئے زبیر موتی والا نے یہ بات کہی۔

انہوں نے کہا کہ عید کی چھٹیاں 3 سے 4 دن ہونی چاہئیں، نیشنل کمانڈ اینڈ آپریشن سینٹر (این سی او سی) اپنے فیصلے پر نظرِ ثانی کرے۔

زبیر موتی والا کا مزید کہنا ہے کہ صبح 6 بجے دکانیں کھولنا کراچی کے تاجروں کا مزاج نہیں، اس کیلئے دن 12 سے رات 12 تک وقت دیں۔

انہوں نے یہ بھی کہا ہے کہ کاروباری اوقات کو اسمارٹ طریقے سے مینج کرنے کی ضرورت ہے۔