سینیٹ قائمہ کمیٹی میں افغان پولیس چیف کے پاس جعلی پاکستانی شناختی کارڈ کی موجودگی کا انکشاف

سیکٹر ایف ٹن کے ایک گھر میں نادرا کے سینئر افسران نے 45 غیر قانونی شناختی کارڈ جاری کردئے

ہر کارڈ کے عوض 10 لاکھ روپے  کی رشوت کی وصولی

اسلام آباد (ویب  نیوز) سینیٹ کی قائمہ کمیٹی برائے داخلہ میں چیئرمین نادرا  نے انکشاف کیا ہے کہ افغان پولیس چیف کے پاس جعلی پاکستانی شناختی کارڈ موجود ہے۔ سنیٹرطلحہ محمود نے انکشاف کیا ہے کہ  سیکٹر ایف ٹن کے ایک گھر میں نادرا کے سینئر افسران نے 45 غیر قانونی شناختی کارڈ جاری کرکے ہر کارڈ کے عوض 10 لاکھ روپے  کی رشوت وصول کی گئی کمیٹی نے غبارے والے پر کتے چھوڑنے کے مقدمہ میں دہشت گردی کی دفعہ شامل کرنے کی ہدایت کردی ہے۔کمیٹیکا اجلاس چیئرمین کمیٹی سینیٹر محسن عزیز کی زیر صدارت پارلیمنٹ ہاؤس میں منعقد ہوا۔ اجلاس کے آغاز میں کوئٹہ دھماکے کے شہدا کے لئے دعا کی گئی۔  کمیٹی نے رحیم یار خان میں مندر پر حملے کے واقعے کی شدید الفاظ میں مذمت کی ہے۔

چیئرمین واراکین کمیٹی نے کہا کہ  پاکستان کی تمام سیاسی جماعتیں اقلیتوں کے حقوق کے تحفظ پر یقین رکھتی ہیں۔ملوث افراد کو جلد بے نقاب کیا جائے۔ ریپ، قتل اور خواتین  سے  ذیادتیوں کے کیسز کی گزشتہ تین سالوں کی تفصیلات طلب کرلی گئیں ۔ واقعات کے تدارک، وجوہات اور بہتری کیلئے لائحہ عمل کا جائزہ لیا جائے گا۔ قائمہ کمیٹی کو نور مقدم قتل کیس  کی رپورٹ فراہم کر دی گئی ہے ۔قائمہ کمیٹی کے اجلاس میں کوویڈ 19 (ذخیرہ اندوزی کی روک تھا م بل2021   کو ترمیم کے ساتھ متفقہ طور پر منظور کر لیا گیا ہے ۔ کیپٹل ٹیرٹری چیریٹیز رجسٹریشن ریگولیشن بل2021  بھی  متفقہ طور پر منظورکرلیا گیا ہے ۔سینیٹر سیف اللہ ابڑو نے کہا کہ صوبہ سندھ میں حالات بہت خراب ہیں لوگوں کو دن ڈھاڑے قتل کر دیا جاتاہے ۔ شکارپور میں پولیس کو محصور کر ڈاکوں نے اس پر گولیاں چلائیں۔ پولیس جرائم پیشہ لوگوں کو پکڑنے سے گریز کیا جارہا ہے  ۔ آئی جی پولیس جوا ب دینے تک کاروادار نہیں ہے۔ ایک صحافی کو سکھر میں قتل کیا گیا۔ ایک صوبائی وزیر کو  قاتل کے گھر عید کے موقع پر دعوت پر مدعو کیا گیا تھا

۔ استاد اشتیاق علی ابڑو کو اغوا کیا گیا آدھ کلو میٹر کے فاصلے پر ڈی ایس پی کا دفتر تھا جہاں رپورٹ درج کر نے سے انکار کر دیا گیا۔ تین دن تک ایف آئی آر درج نہیں کی گئی ایک دوسرے ضلع کے ایس ایچ او نے فون کر کے کہا کہ آ پرچہ درج کر تا ہوں پھرتیسرے ضلع کے ایس ایچ او نے فون پر بتایا کہ اشتیاق علی ابڑو کو قتل کر دیا گیا ہے وہ ایک معذور استاد تھا ۔آر پی او سکھر نے کہا کہ اشتیاق علی ابڑو کے اغوا اور قتل کے الزام میں ملوث پانچ افراد نامزد کیے گئے تھے سب کو گرفتار کر لیا گیا ہے اور ایک جے آئی ٹی بھی بنائی گئی تھی۔ لواحقین نے مزید پانچ افراد کے نام دیئے تو وہ جے آئی ٹی نے شامل نہیں کیے۔ قائد حزب اختلاف سینیٹ سینیٹر سید یوسف رضاگیلانی نے کہا کہ 18 ویں ترمیم کے بعد صوبائی معاملات کے تحت پولیس کی کارکردگی کا جائزہ نہیں لے سکتے۔سابق  سینیٹر عثمان کاکڑ کی موت  کے حوالے سے جوڈیشل کمیشن کیلئے متحدہ اپوزیشن میرے پاس آئی تھی، چیف منسٹر سے بات کر کے جوڈیشل کمیشن بنوایا ہے ۔سینیٹرمحمد طلحہ محمود نے کہا کہ نادرا کی جانب سے افغانستان کے پولیس چیف کو پاکستانی شناختی کارڈ جاری کیا گیا اس کارڈ کی کاپی موجود ہے اس کا عہدہ اور پاسپورٹ نمبر بھی موجود ہے۔ چیئرمین نادرا محمد طارق ملک نے کہا کہ اس طرح کے کیسز کے حوالے سے قائمہ کمیٹی کے اجلاس کا انتظار کرنے کی بجائے فوری طور پر مجھ سے رابطہ کیا جائے۔ ان کا کارڈ جعلی ہے نادرا نے نہیں بنایا وہ کارڈ جس کی رجسٹریشن اور سیریل نمبر نہ ہو وہ جعلی ہوتا ہے ۔ انہوں نے انکشاف کیا اسلام آباد کے سیکٹر ایف ٹن کے ایک گھر میں نادرا کے سینئر افسران نے 45 غیر قانونی نادرا شناختی کارڈ جاری کیے ایک کارڈ کے عوض 10 لاکھ روپے وصول کیے گئے اور ایف ٹن میں ایک بنگلہ بھی اسی مد میں لیا گیا۔کراچی میں بھی ہزاروں کی تعداد میں غیر قانونی شناختی کارڈ جاری کیے گئے ہیں جن میں ڈی ڈیز اور اے ڈیز ملوث ہیں۔چیئرمین نادرا نے کہا کہ نادرا کو ری سٹکچر کیا جارہا ہے۔ مجھے نادرا کا چارج سنبھالے ہوئے چند ہفتے ہوئے ہیں۔غیر قانونی کاموں میں ملوث 87 افراد میں سے 48 کو فارغ کیا گیا ہے کچھ کی انکوائری ایف آئی اے اور کچھ کی انٹرنل کی جارہی ہے ۔تمام ڈیٹا کو دوبارہ دیکھا جائے گا اور لوگ اپنی فیملی ٹری کو بھی ٹھیک کر کے ہماری مدد کریں۔سینیٹر محمد طلحہ محمود نے کہا کہ نادرا اہلکار مختلف خاندانوں میں غیر قانونی اور غیر متعلقہ لوگوں کو شامل کر کے ہزاروں کی تعداد میں شناختی کارڈ بنا رہے ہیں۔سیکرٹری وزارت داخلہ نے کہا کہ وزارت داخلہ نے ان چیزوں کے خلاف چیئرمین نادار کو فری ہینڈ دیا ہے تاکہ ان کا تدارک کیا جا سکے۔سینیٹر سید فیصل علی سبزواری نے کہا کہ ڈائریکٹر ایف آئی اے کے مطابق سندھ میں تین سے چار ملین جعلی شناختی کارڈ بنائے گئے ہیں اس معاملہ کو میں نے سینیٹ اجلاس میں اٹھایا متعلقہ وزیر نے ان اعداد وشمار کو غلط قرار دیا تھا مگر حقیقت میں غیر متعلقہ لوگوں کو کارڈ بنا کر دیئے گئے ہیں۔نادرا حکام اس میں ملوث ہیں اور جن لوگوں نے معاونت فراہم کی ان کو بھی بے نقاب کیا جائے۔سینیٹر سید یوسف رضا گیلانی نے کہا کہ امریکہ افغانستان سے جب نکلے گا تو حالات بہت خراب ہونگے پہلے بھی لاکھوں کی تعداد میں افغان مہاجرین پاکستان داخل ہوئے تھے اب کی بار بارڈر پر موثر کنڑول کیا جائے نادار سمیت دیگر متعلقہ ادارے متحرک رہیں۔چیئرمین نادرا نے کہا کہ ڈائریکٹر ایف آئی اے نے جو الزامات لگائے ہیں ان کو چیلنج کرتا ہوں الزام نہیں لگانا چاہیے ثبوت فراہم کرنے چاہیں اگر کارڈ بنائے گئے ہیں وہ فراہم کریں بلاک کر دیتا ہوں۔چیئرمین کمیٹی سینیٹر محسن عزیز نے کہا کہ عوام جب ویکسنیشن سرٹیفکیٹ کیلئے نادرا جاتی ہے تو وہ 100 روپے وصول کرتے ہیں اور رسید بھی نہیں دی جاتی اور آن لائن سرٹیفکیٹ کیلئے کریڈٹ کارڈ کی سہولت ہے ایزی پیسہ یا دیگر سہولیات نہیں ہیں جس سے عوام کو مشکلات کا سامنا ہے۔ہسکو ل کمپنی کے حوالے سے کمیٹی کو بتایا گیا کہ نارمل انکوائری رجسٹرڈ ہو گئی ہے 60  دن کا وقت لگتا ہے۔ انکوائری مکمل ہونے پر ڈائریکٹر ایف آئی اے نے کہا کہ رپورٹ فراہم کر دی جائے گی۔غبارے والے پر کتے چھوڑنے کے معاملے کے حوالے سے کمیٹی کو بتایا گیا کہ پرچہ درج کر کے ملوث افراد کو گرفتار کیا گیا ہے اور 289 کی دفعہ لگائی گئی ہے۔ سینیٹر رانا مقبول احمد نے کہا کہ دہشت گردی کی دفعہ بھی شامل کی جائے۔ چیئرمین کمیٹی نے کہا کہ وہ اشرافیہ جو سمجھتی ہے غریبوں کا کوئی پرسان حال نہیں ہے ان کے خلاف سخت کارروائی کر کے مثال قائم کی جائے۔ قائمہ کمیٹی نے معاملے کی دوبارہ انکوائری کر نے کی ہدایت کر دی۔سینیٹر فوزیہ ارشد نے کہا کہ احساس پروگرام امداد کے تحت خواتین کو امداد دی گئی تو ان کے فنگر پرنٹ کا مسئلہ آتا ہے۔ کپڑے دھونے ودیگر کام کی وجہ سے خواتین کے فنگرپرنٹس خراب ہو جاتے ہیں کوئی موثر حل نکالا جائے۔

#/S