پنجاب بھر میں شدید دھند، حد نگاہ صفر، موٹرویز سمیت اہم شاہراہیں بند جی ٹی روڈ پر بھی حد نگاہ انتہائی کم ، روڈ یوزرز کو ہدایت کی گئی ہے کہ وہ غیر ضروری سفر نہ کریں،ترجمان موٹر وے پولیس

لاہور  (ویب نیوز)

پنجاب بھر میں شدید دھند چھائی رہی اور حد نگاہ صفر ہو جانے کے باعث موٹر ویز سمیت اہم شاہراہوں کو بند کردیا گیا۔ موٹر وے پولیس کے مطابق موٹر وے ایم ٹو کو لاہور سے شیخوپورہ تک اور ملتان موٹر وے کو فیض پور انٹرچینج سے ننکانہ صاحب اور سیالکوٹ موٹر وے کو مکمل بند کر دیا گیا ۔موٹر وے حکام نے بتایا کہ موٹروے ایم فور پنڈی بھٹیاں سے عبدالحکیم تک جبکہ ایم فائیو شیر شاہ سے گھوٹکی تک شدید دھند کے باعث بند کی گئی ۔ترجمان موٹر وے پولیس کے مطابق جی ٹی روڈ پر بھی حد نگاہ انتہائی کم ہے جس کے باعث روڈ یوزرز کو ہدایت کی گئی ہے کہ وہ غیر ضروری سفر نہ کریں، گاڑیوں پر فوگ لائٹس کا استعمال کریں۔اس کے علاوہ روڈ یوزرز معلومات اور مدد کے لیے ہیلپ لائن 130 پر بھی رابطہ کرسکتے ہیں۔