ہمارے اراکین پر سنجرانی کو ووٹ دینے کیلئے دبائوڈالا جارہا ہے، حکومت ہارس ٹریڈنگ کر کے ہی جیت سکتی ہے،زرداری سے ٹیلی فونک گفتگو
پی ڈی ایم کو سینیٹ میں حکومت پر واضح برتری حاصل ، یوسف رضا گیلانی اور غفور حیدری کی کامیابی کے لیے پر امید ہیں،آصف زرداری
اسلام آباد (ویب ڈیسک)
جمیعت علمائے اسلام( ف )کے سربراہ مولانا فضل الرحمن نے خبر دار کیا ہے کہ سینیٹ الیکشن میں ہماری جیت کو شکست میں بدلا گیا تو سب نامعلوم سامنے لائیں گے، نمبرز ہمارے پاس ہیں، ہمارے اراکین پر سنجرانی کو ووٹ دینے کے لیے دبائو ڈالا جارہا ہے۔مولانا فضل الرحمن نے سابق صدر آصف علی زرداری سے ٹیلی فونک رابطہ کیا ۔اس دوران دونوں رہنمائوں نے پی ڈی ایم کے امیدواروں کی کامیابی یقینی بنانے کی کوششوں پر تبادلہ خیال کیا۔مولانا فضل الرحمن نے چیئرمین اور ڈپٹی چیئرمین سینیٹ سے متعلق گفتگو کے دوران کہا ہے کہ حکومت صرف ہارس ٹریڈنگ کر کے ہی جیت سکتی ہے۔مولانا فضل الرحمن نے سینیٹ الیکشن سے متعلق بات کرتے ہوئے کہا ہے کہ چیئرمین اور ڈپٹی چیئرمین کے انتخاب میں حکومت ہارس ٹریڈنگ کی کوشش کر رہی ہے، حکومت نے ہمارے اراکین کو توڑا تو سب عوام کے سامنے لائیں گے۔انہوں نے مزید کہا کہ ہماری جیت کو شکست میں بدلا گیا تو سب نامعلوم سامنے لائیں گے، نمبرز ہمارے پاس ہیں۔مولانا فضل الرحمن کا کہنا تھا کہ عمران خان کے منہ سے اخلاقیات کی باتیں اچھی نہیں لگتیں۔اس دوران سابق صدر آصف علی زرداری کا کہنا تھا کہ پی ڈی ایم کو سینیٹ میں حکومت پر واضح برتری حاصل ہے، یوسف رضا گیلانی اور غفور حیدری کی کامیابی کے لیے پر امید ہیں۔آصف علی زرداری نے کہا ہے کہ ہمارا ہوم ورک مکمل ہے، تمام اراکین نے حمایت کا یقین دلایا ہے۔
