افغان مسئلہ میں امریکہ کا اتحادی بن کر سب سے زیادہ نقصان اٹھایا،عمران خان
داعش سے چھٹکارے کے لئے طالبان واحد اور بہترین آپشن ہیں، مدد نہ کی تو20سال پرانے طالبان واپس آجا ئیںگے
اپنی ناکامیاں چھپانے کیلئے پاکستان کو قربانی کا بکرا بنایا گیا، امریکہ نے اشرف غنی حکومت اور سکیورٹی فورسز پر بھاری سرمایاکاری کی
طالبان کو وقت دیا جانا چاہیے، انہوں نے درست بیانات دئیے ہیں اور ان کے پاس کوئی اور آپشن نہیں ، ہم ان پر پابندی لگا کر کیا کرلیں گے؟ انٹرویو
اسلام آباد ( ویب نیوز)وزیر اعظم عمران خان نے کہا ہے کہ افغان مسئلہ میں امریکہ کا اتحادی بن کر سب سے زیادہ نقصان اٹھایا ، داعش سے چھٹکارے کے لئے طالبان واحد اور بہترین آپشن ہیں، مدد نہ کی تو20سال پرانے طالبان واپس آجا ئیںگے ۔اسلام آباد میں برطانوی آن لائن خبر رساں ادارے کو انٹرویو دیتے ہوئے عمران خان نے کہا کہ پاکستان کے لیے یہ بہت ضروری ہے کہ واشنگٹن اس چیلنج کو پورا کرے کیونکہ ملک، جہاں امریکا کی زیرقیادت دہشت گردی کے خلاف جنگ سے منسلک تنازع میں ہزاروں افراد ہلاک ہوئے ہیں، ایک بار پھر بھاری قیمت ادا کرے گا۔انہوں نے بتایا کہ یہ واقعی نازک وقت ہے اور امریکا کو خود کو اکٹھا کرنا ہوگا کیونکہ امریکا میں لوگ صدمے کی حالت میں ہیں۔انہوں نے کہا کہ وہ کسی طرح کی جمہوریت، قوم کی تعمیر یا آزاد خواتین کا تصور کر رہے تھے اور اچانک انہیں معلوم ہوا کہ طالبان واپس آگئے ہیں اس لیے ان میں بہت غصہ، صدمہ اور حیرت ہے، جب تک امریکا قیادت نہیں کرے گا ہم پریشان ہیں کہ افغانستان میں افراتفری ہوگی اور ہم اس سے سب سے زیادہ متاثر ہوں گے،
امریکا کے پاس افغانستان میں مستحکم حکومت کی حمایت کے لیے ہر ممکن کوشش کرنے کے علاوہ کوئی اور آپشن نہیں تھا کیونکہ طالبان ہی خطے میں داعش سے لڑنے کا واحد آپشن تھے۔افغانستان میں داعش کی علاقائی وابستگی جسے اسلامک سٹیٹ صوبہ خراسان کے نام سے جانا جاتا ہے، نے طالبان کے خلاف لڑائی کی ہے اور حالیہ مہلک حملوں کی ذمہ داری قبول کی ہے جن میں شمالی شہر قندوز میں ایک شیعہ مسجد پر بمباری جس میں درجنوں افراد ہلاک ہوئے۔ عمران خان نے کہا کہ دنیا کو افغانستان کے ساتھ مشغول ہونا چاہیے کیونکہ اگر وہ اسے تنہا کرتے ہیں تو طالبان تحریک کے اندر سخت گیر لوگ موجود ہیں اور یہ آسانی سے 2000 کے طالبان کے پاس واپس جا سکتا ہے اور یہ ایک تباہی ہو گی۔ طالبان اب بھی امریکی محکمہ خزانہ کے پابندیوں کی فہرست میں شامل ہیں جو اس گروپ کو امریکی سینٹرل بینک میں موجود9 ارب ڈالر سے زائد کے اثاثوں تک رسائی سے روکتے ہیں۔ انہوں نے سویت یونین کی واپسی کے بعد ہونے والی خانہ جنگی کا حوالہ دیتے ہوئے کہا کہ اگر وہ اس طرح افغانستان کو چھوڑ دیں گے تو میری پریشانی یہ ہے کہ افغانستان پیچھے جاتے ہوئے 1989 کا افغانستان بن سکتا ہے جہاں انتشار کے دوران 2 لاکھ افغان ہلاک ہوگئے تھے۔ انہوں نے کہا کہ جو بائیڈن سن نہیں رہے تھے، ہم دونوں میںابھی تک کوئی بات چیت نہیں ہوئی ہے۔انہوں نے بتایا کہ انہوں نے 2008 میں اس وقت کے امریکی سینیٹرز جو بائیڈن، جان کیری اور ہیری ریڈ کو خبردار کیا تھا کہ وہ افغانستان میں ایک دلدل پیدا کر رہے ہیں جس کا کوئی فوجی حل نہیں تاہم انہوں نے نہیں سنا،دو سال بعد پاکستان کے چیف آف آرمی سٹاف جنرل اشفاق پرویز کیانی نے یہی پیغام امریکی صدر براک اوباما کو بھی دیا تھا تاہم بدقسمتی سے انہوں نے اپنے جرنیلوں کی بات سنی اور آپ جانتے ہیں کہ جرنیل ہمیشہ کیا کہتے ہیں، ہمیں مزید فوج اور مزید وقت دیں۔
انہوں نے انٹرویو میں بتایا کہ ہمیں طالبان کے پر امن طریقے سے کابل پر قبضے کو دیکھ کر بہت اطمینان ملا کیونکہ ہمیں خون کی ہولی کھیلے جانے کی توقع تھی تاہم جو ہوا وہ اقتدار کی پرامن منتقلی تھی تاہم ہم نے یہ بھی محسوس کیا کہ ہم اس کے لیے قصوروار ٹھہرائے جارہے ہیں، تین لاکھ افغان فوجیوں نے بغیر کسی لڑائی کے ہتھیار ڈال دیئے، واضح طور پر ہم نے انہیں ہتھیار ڈالنے کے لیے نہیں کہا تھا۔طالبان کے جامع حکومت سازی کے حوالے سے ایک سوال کے جواب میں عمران خان نے کہا کہ یہ جامع حکومت نہیں ہے تاہم کہا کہ یہ حکومت ایک عبوری حکومت ہے۔انہوں نے کہا کہ پاکستان پڑوسی ریاستوں، خاص طور پر تاجکستان اور ازبکستان کے ساتھ مل کر کام کر رہا ہے جو کہ افغانستان کے اندر بڑی تعداد میں نسلی اقلیتیں ہیں، تاکہ طالبان کو نمائندگی بڑھانے کی ترغیب دی جا سکے۔انہوں نے کہا کہ انہیں ایک جامع حکومت کی ضرورت ہے کیونکہ افغانستان ایک متنوع معاشرہ ہے ۔انہوں نے کہا کہ طالبان کو وقت دیا جانا چاہیے، انہوں نے درست بیانات دیے ہیں اور ان کے پاس کوئی اور آپشن نہیں ہے، اگر ہم ان پر پابندی لگا کر کیا کرلیں گے؟ سب سے اچھا طریقہ یہ ہے کہ ان کو اپنی بات پر چلنے کی ترغیب دی جائے تاہم اگر آپ انہیں مجبور کرتے ہیں تو میں انسان کی فطرت کو دیکھتے ہوئے تصور کروں گا کہ وہ پیچھے ہٹ جائیں گے۔انہوں نے کہا کہ امریکا کو افغانستان کو امدادی پیکج دینا ہوگا یا کسی ایسے ملک کے خاتمے کا سامنا کرنا پڑے گا جو داعش کے عسکریت پسندوں کی پناہ گاہ بن جائے گا۔انہوں نے کہا کہ تحریک کے اندر واضح طور پر مختلف دھڑے اور چند مسائل پر واضح قیادت کا فقدان ہے۔ پاکستان اس وقت تحریک طالبان پاکستان (ٹی ٹی پی) کے ساتھ نازک اور سیاسی طور پر حساس مذاکرات میں مصروف ہے جسے اکثر پاکستانی طالبان کہا جاتا ہے۔انہوں نے کہاکہ ٹی ٹی پی اور پاکستانی فوج نے دہشت گردی کے خلاف جنگ کے سائیڈ لائن میں خونی تنازع کا سامنا کیا ہے جس میں 80 ہزار سے زائد جانیں ضائع ہوچکی ہیں۔ٹی ٹی پی جسے پانچ سال قبل قبائلی علاقوں سے نکال دیا گیا تھا، نے فوج کے ساتھ نئی جھڑپوں کے ساتھ اپنی مہم کا دوبارہ آغاز کردیا تھا۔ٹی ٹی پی نے جنگ بندی کے لیے دو شرائط رکھی ہیں،
قبائلی علاقوں میں شرعی قوانین اور قیدیوں کی رہائی جبکہ حکومت پاکستان کا اصرار ہے کہ ان علاقوں میں صرف آئین پاکستان ہی لاگو ہوتا ہے۔وزیر اعظم نے کہا کہ ٹی ٹی پی 50 گروپس پر مشتمل ہے اور وہ ان عناصر سے صلح کرنے کی کوشش کر رہے ہیں جو بات چیت کے لیے تیار ہیں، اب ہم ان لوگوں سے بات کرنے کی کوشش کر رہے ہیں جن میں صلح ہو سکتی ہے، میرا ماننا ہے کہ ہر انتشار بالآخر بحث کی میز پر ختم ہوجاتا ہے۔ انہوں نے کہا کہ طالبان حکومت نے پاکستان سے کہا تھا کہ ٹی ٹی پی کو افغان سرزمین کے اندر سے پاکستان پر حملے کرنے کی اجازت نہیں دی جائے گی۔انہوں نے بھارتی انٹیلی جنس ایجنسیوں پر کابل میں سابق حکومت کے دور میں ان حملوں کی حمایت کا الزام عائد کیا، اب ہمیں ان لوگوں سے بات کرنی ہے جن سے ہم صلح کر سکتے ہیں تاکہ وہ ہتھیار ڈال دیں اور عام شہریوں کی طرح زندگی گزار سکیں۔ عمران خان نے امریکا کی جانب سے افغانستان میں ڈرون حملوں کے مسلسل استعمال کی مذمت کی۔انہوں نے کہاکہ یہ دہشت گردی سے لڑنے کا سب سے برا طریقہ ہے، ایک گائوں میں مٹی کے گھر پر ڈرون حملہ کرنا اور توقع کرنا کہ وہاں کوئی جانی نقصان نہیں ہوگا، زیادہ تر ڈرون حملوں میں غلط لوگوں کو نشانہ بنایا گیا۔ انہوں نے کہا کہ کسی بھی ملک نے ہم جیسی بھاری قیمت ادا نہیں کی، 8 ہزار پاکستانی مارے گئے، معیشت تباہ ہو گئی اور 150 ارب ڈالر کا نقصان ہوا، ہمیں دنیا کی سب سے خطرناک جگہ کہا جاتا تھا، 35 لاکھ لوگ اندرونی طور پر بے گھر ہو گئے،اپنی ناکامیاں چھپانے کے لئے پاکستان کو قربانی کا بکرا بنایا گیا ۔ امریکہ نے اشرف غنی حکومت اور سکیورٹی فورسز پر بھاری سرمایاکاری کی۔ اشرف غنی کی حکومت اور ان کی سکیورٹی فورسز آج کہاں ہیں؟۔انہوںنے کہا کہ وسط ایشیائی ممالک افغانستان کے راستے پاکستان تک رسائی حاصل کرسکتے ہیں۔ میں نے ہمیشہ ڈرون حملوں کی مخالفت کی۔ ہم کسی کا ساتھ نہیں دے رہے، امن کی بات کرتے ہیں۔عمران خان نے کہا کہ یہ کہنا قبل از وقت ہوگا کہ امریکی انخلا کے علاقائی اثرات کیا ہوں گے۔تاہم انہوں نے کہا کہ چین ابھرتی ہوئی قوت ہے جس نے اس خلا میں قدم رکھا اور پاکستان کے ساتھ کھڑا رہا۔ان کا کہنا تھا کہ وہ کونسا ملک تھا جو مدد کے لیے آیا؟ یہ چین تھا جس نے ہماری مدد کی، آپ ہمیشہ ان لوگوں کو یاد رکھتے ہیں جو مشکل وقت میں آپ کی مدد کرتے ہیں۔ انہوں نے کہا کہ اسرائیل کو تسلیم کرنے کے لئے کسی عرب ملک نے دبائو نہیں ڈالا۔
