اسلام آبادہائیکورٹ کا بھارہ کہو بائی پاس منصوبے پر کام روکنے کا حکم ، وفا ق کو نوٹس،جواب طلب جب تک انوائرمنٹل پروٹیکشن ایجنسی سے بھارہ کہو بائی پاس منصوبے کی منظوری نہیں ہوتی کام روک دیں،عدالت

یونیورسٹی کی زمین استعمال کرکے بھارہ کہو بائی پاس بنایاجارہا ہے، وکیل پروفیسرز قائد اعظم یونیورسٹی

سعودی عرب میں تو مساجد گرا کر سڑک بنا دیتے ہیں، یونیورسٹی کی کوئی عمارت متاثر نہیں ہورہی، پھر کیسے اسٹے آرڈر دے دیں ؟عدالت

اگر یہ منصوبہ رک گیا تو ہمیں ناقابل تلافی نقصان ہوگا، قائد اعظم یونیورسٹی کی انتظامیہ کی منظوری سے ہی بھارہ کہو بائی پاس شروع کیا گیا، وکیل سی ڈی اے

 بھارہ کہو بائی پاس منصوبے پر درخت کاٹے جارہے ہیں ماحول تباہ کیا جارہا ہے،وکیل پروفیسرز

 کیا ماحولیاتی ایجنسی سے منصوبے کا ماحولیاتی جائزہ کرایا گیا ؟ :عدالت ، بھارہ کہو بائی پاس منصوبے کی تمام اداروں سے منظوری لی گئی: وکیل سی ڈی اے

اسلام آباد (ویب نیوز)

اسلام آبادہائیکورٹ نے بھارہ کہو بائی پاس منصوبے پر کام روکنے کا حکم دے دیا اور وفاقی حکومت کو نوٹس جاری کرتے ہوئے جواب طلب کرلیا، عدالت نے کہا کہ جب تک انوائرمنٹل پروٹیکشن ایجنسی سے بھارہ کہو بائی پاس منصوبے کی منظوری نہیں ہوتی کام روک دیں، جسٹس میاں گل حسن اورنگزیب نے ریمارکس دیئے کہ سعودی عرب میں تو مساجد گرا کر سڑک بنا دیتے ہیں، یونیورسٹی کی کوئی عمارت متاثر نہیں ہورہی، پھر کیسے اسٹے آرڈر دے دیں ؟۔اسلام آبادہائیکورٹ کے جسٹس میاں گل حسن اورنگزیب نے ہائیکورٹ میں مری،کشمیراورگلیات کے رہائشیوں،سیاحوں کے لیے بھارہ کہو بائی پاس منصوبے کے خلاف درخواست پر سماعت کی ۔ قائد اعظم یونیورسٹی کے پروفیسرز نے بھارہ کہو بائی پاس منصوبے کو ہائیکورٹ میں چیلنج کرتے ہوئے کہا کہ یونیورسٹی کی زمین استعمال کرکے بھارہ کہو بائی پاس بنایاجارہا ہے۔عدالت نے کہا کہ سعودی عرب میں تو مساجد گرا کر سڑک بنا دیتے ہیں۔سی ڈی اے کے وکیل نے بتایا کہ اگر یہ منصوبہ رک گیا تو ہمیں ناقابل تلافی نقصان ہوگا، قائد اعظم یونیورسٹی کی انتظامیہ کی منظوری سے ہی بھارہ کہو بائی پاس شروع کیا گیا، ہمیں یونیورسٹی نے زمین کا قبضہ بھی دے دیا، ہم نے یونیورسٹی سے 200کنال زمین لے کر اسے بدلے میں 225کنال متبادل زمین دی، حالانکہ قائد اعظم یونیورسٹی ایک ارب روپے سے زائد کی نادہندہ ہے۔جسٹس میاں گل حسن اورنگزیب نے کہا کہ مجھے تو لگتا ہے کہ قائد اعظم یونیورسٹی کو زیادہ قیمتی زمین واپس دی جارہی ہے، یونیورسٹی کی کوئی عمارت متاثر نہیں ہورہی، پھر کیسے اسٹے آرڈر دے دیں ؟ وائس چانسلر کو بلالیتے ہیں کیا انہیں دی گئی زمین قبول ہے ؟۔پروفیسرز کے وکیل نے کہا کہ بھارہ کہو بائی پاس منصوبے پر درخت کاٹے جارہے ہیں ماحول تباہ کیا جارہا ہے۔عدالت نے پوچھا کہ کیا ماحولیاتی ایجنسی سے منصوبے کا ماحولیاتی جائزہ کرایا گیا ؟ ۔ سی ڈی اے وکیل نے جواب دیا کہ بھارہ کہو بائی پاس منصوبے کی تمام اداروں سے منظوری لی گئی۔عدالت نے حکم دیا کہ جب تک انوائرمنٹل پروٹیکشن ایجنسی سے بھارہ کہو بائی پاس منصوبے کی منظوری نہیں ہوتی کام روک دیں۔