قومی مجرم کی وطن واپسی کیلئے ریاست نے قانون اور انصاف کو دفن کردیا ،پی ٹی آئی
رجیم چینج سازش کے بعد آئین و جمہوریت بیزار عناصر نے ملک کو زنجیروں میں جکڑ کر کرپٹ بھیڑیوں کے آگے پھینک دیا
غیر سیاسی ترکیبوں اور غیراخلاقی و غیر جمہوری منصوبوں سے ظلم و جبر کے سلسلے کو دوام بخشنا ممکن نہیں،ترجمان پی ٹی آئی
اسلام آباد ( ویب نیوز)
پاکستان تحریک انصاف کے ترجمان نے نواز شریف کی واپسی پر ردعمل دیتے ہوئے کہا ہے کہ قومی مجرم کی وطن واپسی کیلئے ریاست نے قانون اور انصاف کو اپنے ہاتھوں سے دفن کردیا ،غیر سیاسی ترکیبوں اور غیراخلاقی و غیر جمہوری منصوبوں سے ظلم و جبر کے سلسلے کو دوام بخشنا ممکن نہیں۔ ترجمان پی ٹی آئی نے اپنے آفیشل ایکس اکائونٹ پر بیان جاری کرتے ہوئے لکھا ہے کہ ایک قومی مجرم کی وطن واپسی کیلئے ریاست نے قانون اور انصاف کو اپنے ہاتھوں سے دفن کردیا ہے،۔ن لیگ کے قائد کی واپسی پر ترجمان پی ٹی آئی نے کہا کہ رجیم چینج سازش کے بعد آئین و جمہوریت بیزار عناصر نے ملک و قوم کو زنجیروں میں جکڑ کر کرپٹ بھیڑیوں کے آگے پھینک دیا ہے، یہی سوچ ہے 75 سال بعد بھی قوم کے پائہں کی زنجیر اور ملک کی کسمپرسی، بیچارگی اور زوال کی بڑی وجہ ہے۔ترجمان کا کہنا ہے کہ چیئرمین پی ٹی آئی نے 27 برس قبل جرم اور ریاست کے مابین اسی اشتراکِ بد کے خلاف بے مثال سیاسی جدوجہد کا فیصلہ کیا، ان کی قیادت میں آج قوم ملک کو سازش، طاقت اور چوروں، ٹھگوں، دھوکے بازوں اور بے حمیت مافیاز کے اشتراک سے فتح کرنے والی قوتوں کے سامنے شعور سے لیس ہوکر اپنے پورے قد سے کھڑی ہے۔ انہوں نے کہا کہ عدالتیں قوم کو نسل در نسل لوٹنے والے جس مجرم کا احتساب کرنے میں ناکام رہیں، اس کا محاسبہ عوام کریں گے، قوم مجرم کے خاطر خواہ استقبال کیلئے تیار ہے، جس قوم نے رجیم چینچ سازش کو بے پناہ جبر کے باوجود قبول نہیں کیا وہ لندن منصوبے اوراس کے اہداف بھی قبول نہیں کرے گی۔ترجمان تحریک انصاف نے کہا کہ غیر سیاسی ترکیبوں اور غیراخلاقی و غیر جمہوری منصوبوں سے ظلم و جبر کے سلسلے کو دوام بخشنا ممکن نہیں، شفاف،آزادانہ اورمنصفانہ انتخابات کا فوری انعقاد ہی پاکستان کے مسائل کو حل کرسکتا ہے۔
