وزیراعظم کی زیر صدارت قومی رابطہ کمیٹی برائے ہاوسنگ، کنسٹرکشن و ڈویلپمنٹ کا اجلاس
وزیراعظم کو لاہور میں جاری کیڈاسٹرل میپنگ مشق پر بریفنگ دی گئی
وزیراعظم کو وزارت ہاوسنگ اور ورکس کے تحت مختلف ہاوسنگ منصوبوں کی پیش رفت سے بھی آگاہ کیا گیا
متعلقہ حکام لاہور کے اراضی ریکارڈ کو جلد از جلد ڈیجیٹل کرنے کی تکمیل پر توجہ دیں،عمران خان
اسلام آباد (ویب ڈیسک)
وزیراعظم عمران خان کی زیر صدارت قومی رابطہ کمیٹی برائے ہاوسنگ، کنسٹرکشن و ڈویلپمنٹ کا اجلاس ہوا،اجلاس میں وزیر خزانہ شوکت فیاض ترین ، وزیر مملکت برائے اطلاعات و نشریات فرخ حبیب ، وزیراعظم کے معاون خصوصی ڈاکٹر شہباز گل ، گورنر سٹیٹ بینک رضا باقر ، چیئرمین نیا پاکستان ہاوسنگ اینڈ ڈویلپمنٹ اتھارٹی (NAPHDA) لیفٹیننٹ جنرل (ر)انور علی حیدر اور دیگر متعلقہ سینئر افسران نے شرکت کی،وزیراعظم کو لاہور میں جاری کیڈاسٹرل میپنگ مشق پر بریفنگ دی گئی۔ انہیں بتایا گیا کہ منصوبہ ٹریک پر ہے اور 15 نومبر 2021 تک مکمل ہو جائے گا۔وزیراعظم نے متعلقہ حکام کو ہدایت کی کہ وہ لاہور کے اراضی ریکارڈ کو جلد از جلد ڈیجیٹل کرنے کی تکمیل پر توجہ دیں تاکہ زمین پر قبضہ مافیا اور تجاوزات کے خلاف ایک عام آدمی کو ریلیف مل سکے۔وزیراعظم کو وزارت ہاوسنگ اور ورکس کے تحت مختلف ہاوسنگ منصوبوں کی پیش رفت سے بھی آگاہ کیا گیا۔وزیر اعظم کو آگاہ کیا گیا کہ وزارت ہاوسنگ اینڈ ورکس 86،323 ہاسنگ یونٹس تعمیر کر رہی ہے جن کی مجموعی لاگت 463 ارب روپے ہے۔اس کے مختلف منصوبوں کے تحت ملک میں تعمیراتی سرگرمیوں میں تیزی سے 200،000 سے زیادہ روزگار کے مواقع پیدا ہو رہے ہیں۔2314 ارب روپے سے زائد مالیت کی معاشی سرگرمیاں پیدا ہوں گی۔وزیر اعظم نے اس بات کا اعادہ کیا کہ اونچی عمارتوں کی شکل میں عمودی رہائش حکومت کی ترجیح ہے۔ یہ نہ صرف تیزی سے بڑھتی ہوئی آبادی کی رہائشی ضروریات کو پورا کرے گا بلکہ ڈیجیٹلائزڈ کیڈاسٹرل میپپنگ کے مطابق شہروں کی زمین کے موثر استعمال کو بھی یقینی بنائے گی۔
