عمران خان کے بیانات نشر کرنے پر پابندی کیخلاف کیس: پیمرا کا 4 دسمبر کا نوٹیفکیشن معطل
پی ٹی آئی کی درخواست پر پیمرا اور وفاق کو نوٹس جاری، فریقین سے 21 دسمبر کو جواب طلب
کراچی (ویب نیوز)
سندھ ہائیکورٹ نے پاکستان تحریک انصاف کے سابق چیئرمین عمران خان کے بیانات نشر کرنے پر پابندی کے خلاف کیس میں پیمرا کا 4 دسمبر کا نوٹیفکیشن معطل کردیا۔سندھ ہائیکورٹ کے جسٹس عدنان اقبال چوہدری نے سابق چیئرمین پی ٹی آئی عمران خان کے بیانات نشر کرنے پر پابندی کے خلاف کیس کی سماعت کی۔وکیل تحریک انصاف بیرسٹر علی طاہر نے کہا کہ سابق وزیراعظم عمران خان کے بیانات پر پابندی عائد کرنا قانون کی خلاف ورزی ہے، پیمرا نے غیر قانونی طور پر پابندی کا نوٹیفکیشن جاری کیا۔عمران خان کے وکیل نے عدالت سے استدعا کی کہ پیمرا کا 4 دسمبر کا نوٹیفکیشن کالعدم قرار دیا جائے۔بیرسٹر علی طاہر کے دلائل مکمل ہونے کے بعد سندھ ہائیکورٹ نے عمران خان کے بیانات پر پابندی کے خلاف درخواست پر محفوظ فیصلہ سناتے ہوئے پیمرا کا 4 دسمبر کا نوٹیفکیشن معطل کردیا۔سندھ ہائیکورٹ نے پی ٹی آئی کی درخواست پر پیمرا اور وفاقی حکومت کو نوٹس جاری کرتے ہوئے فریقین سے 21 دسمبر کو جواب طلب کرلیا۔یاد رہے کہ بیرسٹرعلی طاہر نے پیمرا کا نوٹیفکیشن سندھ ہائیکورٹ میں چینلج کیا تھا۔۔۔۔۔۔
