درخواست مسترد ہونے کا خدشہ، پی ٹی آئی کا الیکشن کمیشن کے فیصلے کیخلاف عدالت سے رجوع کا فیصلہ موخر
پی ٹی آئی کو الیکشن کمیشن سے تاحال فیصلے کی مصدقہ کاپی نہیں ملی، پارٹی کو خدشہ ہے مصدقہ کاپی نہ ہونے کی صورت میں درخواست مسترد ہو سکتی ہے
کیس کب اور کہاں دائر کیا جائے اس حوالے سے حامد خان، بیرسٹر ظفر اور بیرسٹر گوہر علی کی مشاورت جاری ہے
پارٹی رہنماؤں کی جانب سے الیکشن کمیشن کے فیصلے کے خلاف بانی چیئرمین پی ٹی آئی سے مشاورت کا بھی امکان ہے،ذرائع
پشاور
پاکستان تحریک انصاف نے درخواست مسترد ہونے کے خدشے کے پیش نظر انٹرا پارٹی الیکشن کے حوالے سے الیکشن کمیشن کے فیصلے کے خلاف عدالت سے رجوع کا فیصلہ موخر کر دیا۔ گزشتہ روز الیکشن کمیشن نے پی ٹی آئی کے انٹرا پارٹی الیکشن کو کالعدم قرار دیتے ہوئے ان سے بلے کا انتخابی نشان بھی واپس لے لیا تھا۔ پی ٹی آئی رہنما بیرسٹر گوہر علی خان نے الیکشن کمیشن کے فیصلے کو مسترد کرتے ہوئے فیصلے کے خلاف پشاور ہائیکورٹ سے رجوع کرنے کا اعلان کیا تھا۔ پی ٹی آئی کا الیکشن کمیشن کے فیصلے خلاف عدالت سے رجوع کرنے کا معاملہ تاخیر کا شکار ہو گیا ہے۔ ذرائع کے مطابق پی ٹی آئی کو الیکشن کمیشن سے تاحال فیصلے کی مصدقہ کاپی نہیں ملی، پارٹی کو خدشہ ہے کہ مصدقہ کاپی نہ ہونے کی صورت میں درخواست مسترد ہو سکتی ہے۔ ذرائع کا بتانا ہے کہ کیس کب اور کہاں دائر کیا جائے اس حوالے سے حامد خان، بیرسٹر ظفر اور بیرسٹر گوہر علی کی مشاورت جاری ہے۔ ذرائع کے مطابق پارٹی رہنماؤں کی جانب سے الیکشن کمیشن کے فیصلے کے خلاف بانی چیئرمین پی ٹی آئی سے مشاورت کا بھی امکان ہے۔
